E përditësuar/ Në dalje të Konferencës së kryetarëve deputeti socialist Taulant Balla tha se u vendos që seanca e jashtëzakonshme e parlamentit për ligjin e vettingut do të mbahet të martën e ardhshme në orën 17:00 si dhe u vendos gjithashtu që të përshpejtohet puna për dy nga 7 ligjet që shoqërojnë paketën kushtetuese, atë të SPAK-ut dhe të Prokurorisë.
“U ra dakort në konsultim edhe me kryetarin e kuvendit, që më datë 30 gusht pasdite në orën 17: 00 kuvendi të mblidhet në një sesion të jashtëzakonshëm për të diskutuar paketën e ligjeve për ndryshimet kushtetuese. U la detyrë në komisionin e posaçëm që të ecim me dy ligjet, atë për SPAK-un dhe atë të organizimit të gjyqësorit.”- tha Taulant Balla.
Në lidhje me kundërshtitë e PD-së për ligjin e Vettingut që u miratua sot në parim me votat e maxhorancës, dhe me mundësinë se ajo mund ta ankimojë në Gjykatën Kushtetuese, Balla tha:
“Ka një gjë të qartë, që kushtetueshmërinë e ligjeve në Shqipëri nuk e shqyrton PD por gjykata Kushtetuese. Këtë të drejtë nuk e ka PD, lajmi i mirë sot nga selia e kuvendit, është që seanca do të zhvillohet, deputetët e kuvendit të cilët janë me pushime do të rikthehen sepse kemi seancë të jashtëzakonshme.”
….
Ka nisur këtë të martë mbledhja e Konferencës së Kryetarëve për të vendosur për datën e seancës plenare që do të mblidhet për miratimin e ligjeve që shoqërojnë ndryshimet kushtetuese,e në veçanti për ligjin e Vettingut, i cili mori votën në parim sot vetëm me anë të votave të maxhorancës.
Mësohet se seanca plenare do të zhvillohet më datën 30 gusht.
Konferenca mblidhet për të diskutuar në lidhje me 7 ligjet në fjalë dhe për të vendosur mes një datë përfundimtare pëer mbledhjen e parlamentit në seancë të jashtëzakonshme.
Këtë pasdite, opozita nuk ka votuar në komisionin e reformës në drejtësi ligjin për vettingun me argumentin se shumë pjesë të saj janë në kundërshtim me kushtetutën e re të 22 korrikut. Sipas opozitës, amendimet dhe sugjerimet e saj për këtë ligj nuk u morën parasysh nga maxhoranca e cila e kaloi në parim e vetme vettingun./java/a.k
