Është mbledhur sot Konferenca e Kryetarëve ku janë shqyrtuar kërkesat e Partisë Demokratike “Për ngritjen e Komisionit Hetimor të Kuvendit për verifikimin e ligjshmërisë së veprimeve të zyrtarëve shqiptarë në raport me ish-agjentin special të FBI-së, Charles McGonigal” si dhe ajo për “Për ngritjen e Komisionit Hetimor të Kuvendit për kontrollin e ligjshmërisë së veprimtarisë të organeve të pushtetit qendror dhe pushtetit vendor, si dhe për të verifikuar përdorimin e burimeve të administratës shtetërore për qëllime elektorale në zgjedhjet e 11 maj 2025”. Pjesë e rendit të ditës ishte dhe kërkesa për ‘Zhvillim të mocionit me debat’.
Kryetari i Kuvendit, Niko Peleshi ka komentuar dhe senacën e djeshme, duke iu drejtuar në këtë rast deputetit demokrat Agron Gjekmarkaj. Peleshi tha se gjuha e përdorur ditën e djeshme nga opozita, përmendim këtu dhe ofendimet e Gazment Bardhit që çoi dhe në përjashtimin e tij nga salla, të dhunshme dhe të turpshme, përtej çdo caku të pranueshëm, edhe në kontekstin e opozitarizmit.
Peleshi ka theksuar se “ajo që ndodhi dje nuk mund të fshihet pas finesës letrare”, duke iu referuar mënyrës së artikulimit të Gjekmarkajt në seancën plenare.
“Gjuha që u përdor dje në sallën e Kuvendit ka qenë e dhunshme dhe e turpshme, përtej çdo caku të pranueshëm, edhe kur vjen nga opozita, edhe në kontekstin e opozitarizmit është e papranueshme. Ajo që ndodhi dje nuk mund të fshihet pas finesës suaj letrare.
Për sa më përket, gjatë gjithë drejtimit tim dhe në mbarë karrierën time politike, mund të akuzohem vetëm për durimin e tepruar. Kam treguar një durim të jashtëzakonshëm dhe nuk jam marrë, e as do të merrem, me sulme personale ndaj askujt.
E vlerësoj shumë edhe elokuencën tuaj politike, por sot më vjen keq të them se ndërhyrja juaj është thellësisht e ndikuar nga kalkulime politike. Nëse ju vazhdoni të mbroni atë që ndodhi dje, në fakt po nxisni një klimë përplasjesh dhe mosmarrëveshjesh që nuk i shërben askujt as Kuvendit, as qytetarëve, as vetë opozitës”, tha Peleshi.
Blushi në Konferencën e Kryetarëve: Arroganca po shkatërron parlamentarizmin
Sekretari i Përgjithshëm i Partisë së Lirisë Tedi Blushi, ka debatuar me Niko Peleshin dhe Taulant Ballën në Konferencës e Kryetarëve. Blushi tha se injoranca, arroganca dhe rrugaccëria po shkatërrojnë parlamentarizmin në vend.
“Arroganca, injoranca dhe rrugaçëria po shkatërrojnë parlamentarizmin dhe për këtë është fajtor PS dhe Kryetari i Kuvendit. Seancat po dështojnë se ju e urreni Parlamentarizmin, nuk respektoni Kushtetutën dhe as rregulloren e Kuvendit.
Ju nuk po ndëshkoni opozitën duke mbyllur seancat, por po ndëshkoni parlamentarizmin
Ju po përjashtoni ne bllok opozitën kur ndërkohë për çdo shkelje rregullore ndëshkimi është personal për çdo deputet. Ju Balla i propozoni PD një marrëveshje ekstrapolitike, por e vetmja marrëveshje për te rikthyer normalitetin ne seance është zbatimi i rregullores dhe i Kushtetutës.
Jepini fund patetizmave dhe një sentimentalizmi etik hipokrik dhe sjelljes rrugaçërore në Parlament”, tha Blushi.
