Shqiptarët vazhdojnë të paguajnë për autostradën Durrës-Kukës, ose siç njihet “Rruga e Kombit”.
Fillimisht u pagua për ndërtimin e saj, ku mësohet se kostoja ka shkuar 1.3 miliardë euro. Më pas, shqiptarët vazhdojnë të paguajnë taksën e qarkullimit, të future në çmimin e naftës.
Përpos këtyre pagesave, Autoriteti Rrugor Shqiptar ka hedhur idenë se kjo rrugë të jepet me koncesion, përkundrejt një tarife për përdoruesit e saj. Kështu, një autoveturë mund të paguajë deri në 3 euro për çdo kalim, ndërsa mjetet e mëdha, deri në 5 euro.
Janë hapur procedurat e dhënies me koncesion, ndërsa është shpallur edhe fituesi. Ndërkohë, sipas dokumenteve që disponon gazeta “Shqip”, Autoriteti Rrugor Shqiptar, megjithëse kjo rrugë është në procesin e dhënies me koncesion, ka akorduar plot 164 milionë lekë të reja për mirëmbajtjen e tunelit të Kalimashit.
Nuk dihet përse jepet ky fond në këtë kohë, megjithëse vetë ARRSH-ja e pranon se objektivi kryesor i saj mbetet dhënia me koncesion e mirëmbajtjes, operimit, menaxhimit dhe tarifës së paguar për korridorin rrugor Milot deri në Morinë, dhe kjo procedure pritet të përfundojë brenda vitit 2016.
“Përgatitjet mbi këtë objektiv kanë nisur me asistencë nga financimi i Bankës Botërore. Ndërkohë, gjatë këtyre dymbëdhjetë muajve do të vazhdohet me kontratën për operimin, menaxhimin dhe mirëmbajtjen e pajisjeve dhe sistemeve të Tunelit të Thirrës si dhe të vetë tunelit të Thirrës, deri në dorëzimin e tunelit dhe pajisjeve të tij koncesionarit të suksesshëm, me qëllim që të sigurohet në vazhdimësi puna operuese e mirëmbajtja e tunelit në përputhje kjo me qëllimet e Direktivës së BE-së 2004/54/EU mbi kërkesat minimale të sigurisë për tunelet e Rrjetit Rrugor Trans-Europian” thuhet në dokumentet.
Në dokumentet që disponon gazeta “Shqip” thuhet se, në emër të Qeverisë së Shqipërisë, Autoriteti Rrugor Shqiptar (ARRSH), kërkon të sigurojë propozime teknike dhe financiare për të përzgjedhur një Kontraktor (kompani Kontraktore) për Operime në Tunele, nën një Kontratë sipas së cilës ai do të jetë përgjegjës për operimin dhe funksionimin e tunelit, ambientet përreth tij si dhe mirëmbajtjen e pajisjeve dhe sistemeve të operimit të tunelit.
Mësohet se menaxheri i Tunelit, sikurse shpjegohet edhe më lart, do të sigurojë shërbimet e kërkuara të menaxhimit/operimit të tunelit dhe shërbimet e kërkuara të mirëmbajtjes dhe funksionimit të pajisjeve të tij në bashkëpunim të ngushtë dhe në koordinim me Punëdhënësin, si dhe Brigadën e Shërbimit të Zjarrëfikësve të Tunelit, ashtu si edhe me gjithë autoritetet e tjera të përfshira për këtë qëllim.
“Menaxheri i Tunelit do të sigurojë gjithë shërbimet e kërkuara për operimin dhe menaxhimin e tunelit si dhe mirëmbajtjen e funksionalitetin e pajisjeve të tij gjatë periudhës 12- mujore, madje dhe me ndonjë tejzgjatje kontraktuale të kësaj periudhe në rast se do të duhet të jetë e nevojshme (subjekt i direktivave dhe miratimit të Punëdhënësit-ARRSH), si dhe operimet dhe procedurat e dorëzimit ndaj Kontraktorit të Koncesionit sapo ai të përcaktohet në bazë të procedurave” thuhet në këto dokumente.
Korridori rrugor i planifikuar ndërmjet Durrësit dhe Morinës bën lidhjen ndërmjet portit kryesor të Shqipërisë, atë të Durrësit me Kosovën si dhe me Ballkanin Jugor. Me shtrirjen e planifikuar që nga porti i Durrësit, korridori ka potencialin që të zhvillojë bindshëm lidhjet ekonomike ndërmjet Ballkanit Jugor dhe Adriatikut, korridori ka gjithashtu potencialin që të zhvillojë tregtinë me vendet e tjera të Ballkanit, veçanërisht me Kosovën dhe Malin e Zi.
“Segmenti rrugori i kësaj pjese Milot – Rrëshen , me një gjatësi prej 27 km, përbëhet nga një karrexhatë me dy korsi kalimi. Më tej nga Rrësheni në Morinë, rruga vazhdon me 2 karrexhata me nga 2 korsi kalimi dhe korsi emergjence.
Gjerësia totale e rrugës është 22 m. Në seksionin Rrëshen – Kalimash, ndodhet edhe Tuneli i Thirrës, tuneli më i madh në vendin tonë, i ndërtuar sipas Standardeve Europiane të Projektimit të tuneleve rrugore. Ai përbëhet nga dy tuba, që respektivisht përputhen me dy karrexhatat e rrugës, me gjatësi 5580 m tubi verior dhe 5571 m tubi jugor” pohon ARRSH, e cila thotë se nuk ka kapacitetet e duhura për ta menaxhuar këtë tunel, apo në tërësi rrugën.
