Rruga e Kombit, e cila do të operohet dhe mirëmbahet nga kompania Vendeka, sipas ofertës së shpallur fituese, do të kërkojë investime të menjëhershme për ta sjellë atë në standarde.
Në një dokument të IFC dhe Ministrisë së Transportit, mbi të cilën u bazua edhe tenderi i fundit jepen në detaj shifrat mbi të cilat u ngrit oferta e turqve. Paraprakisht institucionet përcaktuan se çmimi do të jetë 5 euro, duke lënë si opsion garancinë minimale, që do të ofrohej nga kompania, si kriter vlerësimi.
Por çfarë nxjerrin në pah në fakt shifrat zyrtare?
Investimet kapitale në një afat të shkurtër
Urë e re në Kukës kosto 15 milionë euro
Punime për shpatet anësore 11.3 milionë euro
Kryeqëzimet në disnivel dhe ato të zakonshme 6.5 milionë euro
Masa për mbrojtjen mjedisore 3 milionë euro
Stacionet e pagesës 2.5 milionë euro
Të tjera (thurje ndriçim dhe përmirësim sigurie) 7.3 milionë euro
Totali 45.6 milionë euro
Në terma afatgjatë, përfshirë periudhën 30vjeçare të operimit, shtohen edhe shpenzime të tjera. Konsulenti, që në këtë rast është Korporata Ndërkombëtare Financiare, së bashku me ministrinë, ka dhënë edhe vlerën totale të CAPEX ( shpenzimet kapitale) dhe REPEX ( ato të mirëmbajtjes).
Operimi i autostradës 11 milionë euro
Kostot e operimit të stacioneve të pagesës 27.8 milionë euro
Mirëmbajtje rutinë 42.4 milionë euro
Mirëmbajtje dimërore 14.9 milionë euro
Operimi i dhe mirëmbajtja e tunelit 52.4 milionë euro
Total operim dhe mirëmbajtje rutinë 148 milionë euro
Mirëmbajtje (me investime të theksuara) total 50.8 milionë euro nga të cilat:
Shtrim rruge 22.9 milionë euro
Struktura 11 milionë euro
Drenazhe 1.4 milionë euro
Pajisje tuneli 15.5 milionë euro
Gjithsesi për çdo situatë të jashtëzakonshme në rrugë dhe që ka nevojë për investim duket se do të jetë qeveria ajo që do të paguajë. Një rast i tillë, për shembull, mund të konsiderohet një rrëshqitje në tunel, një precedent që ka ndodhur edhe më parë.
Por, si paraqitet trafiku në këtë rrugë?
Në monitorimin që ju bë nga marsi 2014 deri në shtator 2015, rezulton që gushti të ketë edhe pikun e trafikut me 9185 mjete në ditë dhe 10 307 mjete respektivisht. Mesatarja ditore për gjithë vitin në segmentin e parë është 6400 mjete dhe ky trafik përfshin nga makinat e vogla deri tek kamionët e mëdhenj dhe autobusët, të cilët do të trajtohen në mënyrë të diferencuar. Gjithsesi, me një llogari të thjeshtë, nëse shumëzojmë 6400 mjetet me 5 euro që do të jetë tarifa fillestare rezulton një arkëtim prej 32 mijë eurosh në ditë. Këtë vlerë e shumëzojmë me 365 ditë të vitit, ku marrim një vlerë 11 680 000 euro.
Nëse këtë vlerë e llogarisim për 30 vite të koncensionit vlera e parashikuar për arkëtim është 350 milionë euro. Në rastin më të keq, nëse trafiku i segmentit të parë do të humbasë për shkak të rrugëve alternative në tunelin e Thirrës, mesatarja e mjeteve është 4200 mjete në ditë përgjatë vitit. Kjo do të thotë që me këtë skenar arkëtimi do të jetë 230 milionë euro. Në secilin nga variantet do të jenë shqiptarët ata që do të paguajnë jo vetëm tarifën por edhe garancinë që do i jepet kompanisë kur trafiku bie në minimum por këtë përmes taksave të tyre. /SCANTV/a.m.
