Ministria e Zhvillimit Urban do të ndërtojë një kompleks banimi në zonën e Tufinës, në një hapësirë prej 16.500 m2, për të pastrehët që deri tani jetojnë në godinat e Universitetit Bujqësor Tiranë dhe në godinën e ish-Institutit të Kërkimeve Biologjike. Janë 514 familje që do të përfitojnë nga ky projekt, shkruan Gazeta Shqiptare. Vendimi i botuar në Fletoren Zyrtare saktëson se “përfitues nga projektet e banesave që do të ndërtohen në këtë pronë do të jenë qytetarët e pastrehë dhe ata të sistemuar aktualisht në godinat e Universitetit Bujqësor Tiranë dhe në godinën e ish-Institutit të Kërkimeve Biologjike Tiranë.
Miratimi i listave bëhet me vendimin e këshillit bashkiak dhe përfituesit duhet të plotësojnë kushtet dhe kriteret për strehim social, bazuar në ligjin nr. 9232, datë 13.5.2004, ‘Për programet sociale për strehimin e banorëve të zonave urbane’, të ndryshuar. Vendimi përcakton kalimin në përgjegjësi administrimi, nga Ministria e Mbrojtjes te Ministria e Zhvillimit Urban, të pronës nr. 101, me emërtim ‘Depo ushqimi e ish-Repartit Ushtarak nr. 5011’, me vendndodhje te Rrapi i Treshit, Tiranë, sipas planvendosjes që i bashkëlidhet këtij vendimi dhe është pjesë përbërëse e tij, për ta përdorur për realizimin e projekteve për ndërtimin e banesave sociale”.
Sipas vendimit, urdhërohen ministri i Mbrojtjes, ministri i Zhvillimit Urban, Agjencia e Inventarizimit dhe Transferimit të Pronave të Paluajtshme, kryeregjistruesi i Pasurive të Paluajtshme të Republikës së Shqipërisë dhe Bashkia Tiranë për zbatimin e këtij vendimi. Sipas ligjit në fuqi, për programet sociale për strehimin e banorëve të zonave urbane mësohet se objekt i këtij ligji është përcaktimi i rregullave dhe procedurave administrative për mënyrat e sigurimit, të shpërndarjes, të administrimit dhe të planifikimit të programeve sociale për strehimin, me qëllim krijimin e mundësive për strehim të përshtatshëm dhe të përballueshëm, duke u mbështetur në aftësitë paguese të familjeve që kanë nevojë për strehim dhe për ndihmën e shtetit.
Programet sociale të strehimit klasifikohen: 1.Programe të banesave sociale me qira, në të cilat përfshihen: a) banesat, që ndërtohen apo blihen nga tregu i lirë nga bashkitë ose organizatat jofitimprurëse, të cilat jepen me kontratë qiraje sociale; b) banesat ekzistuese, në pronësi të personave fizikë ose juridikë, të cilat janë klasifikuar nga organet e qeverisjes vendore apo nga organizatat jofitimprurëse si banesa sociale, që mund të jepen me qira për familjet që përfitojnë bonus strehimi; c) objektet e dala jashtë funksionit, si rezultat i mbylljes së një veprimtarie, të cilat kanë kaluar në pronësi të bashkive dhe janë miratuar për t’u kaluar në fond banesash sociale me qira, në përputhje me planin rregullues urbanistik. 2. Programe të banesave me kosto të ulët. 3. Programe të pajisjes së truallit me infrastrukturë.
BW