Që të deklarohesh zyrtarisht i vdekur në shumicën e vendeve, duhesh të përjetosh humbjen e plotë të funksionit të trurit, ose ‘vdekjen e trurit’.
Dhe përderisa ky është fundi absolut dhe i pashmangshëm i njerëzve, një kompani në SHBA beson se mund ta mposhtë këtë fund.
Bioquark, një kompani e kujdesit shëndetësor është duke studiuar teknologjinë e riparimit dhe reanimacionit, duke thënë se vdekja mund të mos jetë e ‘pashmangshme’ dhe se njerëzimi ka arritur në një pikë për ta testuar këtë.
“Neve na thuhet nga mjekësia se vdekja e trurit është e pashmangshme dhe duhet të konsiderohet si pika e fundit”, tha Ira Pastor, shef i Bioquark, transmeton Gazeta Express.
“Ose është e shmangshme? A kemi arritur në një pikë teknologjike ku jemi në gjendje që ta shtyjmë vdekjen për të parë nëse kjo është e vërtetë?”, shtoi ai.
Mungesa e oksigjenit, që ndodh si pasojë e mos qarkullimit të gjakut, çon në humbje të përhershme të funksionit të trurit. Por tani konfirmimi i vdekjes është më e komplikuar, për shkak se është e pamundur të mbash zemrën në jetë pasi truri ka pushuar së funksionuari.
Kjo mund të bëhet duke e mbajtur një person në ventilator, i cili lejon trupin dhe zemrën që të furnizohet me oksigjen në mënyrë artificiale, për shembull.
Në Britani dhe SHBA, ndryshe nga vendet e tjera, një person konfirmohet se ka vdekur vetëm kur funksioni i trurit ka pushuar përgjithmonë.
Pastor është pjesë e një projekti të quajtur “ReAnima”. Ky projekt ka për qëllim që të eksplorojë teknologjinë biomjekësore për neuro-rigjenerimin dhe neuro-reanimacionin njerëzor.
Misioni i projektit është që të fokusohet në hulumtime të vdekjes së trurit, për të gjetur mundësinë e mbajtjes në jetë të trurit edhe pasi furnizimi i trupit me oksigjen të ketë përfunduar. /b.d
