Fakte të reja janë zbuluar ditën e sotme nga skandali i kandidatit të PD-së për Bashkinë e Vorës, Fiqiri Ismaili për të manipuluar rezultatin e 21 qershorit nëpërmjet blerjes së votës.
Dy ditë më parë policia bllokoi disa furgona me 125 thasë me miell. Pas kontrollit të bërë faturave të miellit dhe pasaktësitë që u gjetën rezutoi se kompania “Agro Blend” në pronësi të kryebashkiakut Fiqiri Ismaili, i ka shituar rreth 25 kuintalë miell një “individi”, që nuk ka numër NIPTi.
Në fakt këtu qëndron edhe shkelja pasi shitja e mallit duhet bërë vetëm nga subjekte që tregtojnë mallra me shumicë dhe jo nga individë. Prandaj edhe faturat rezlutuan të parregullta.
Gjithashtu, dyshimet për fatura fiktive shtohen edhe më shumë nëse i referohemi çmimit që “Agro Blend” ka aplikuar në shitje për individ, 23.4 lekë.
Ky çmim është disa herë më i ulët krahasuar me çmimin mesatar të konsumit publikuar nga Instituti i Statistikave në muajin mars që është 159.7 lekë për Kg, duke shtrembëruar konkurrencën dhe deklaruar më pak për buxhetin e shtetit.
Kjo do të thotë se kompania e Fiqiri Ismailit, ka kryer ndër të tjera edhe evazion fiskal. Megjithatë mbetet e çuditshme që një individ të mund të ketë blerë 25 kuintalë thasë me miell, por se do të jenë hetimet që do të zbulojnë nëse ky miell ishte i destinuar në këmbim të votës.
