Pas vitesh ndërperje të plotë aktiviteti, ka nisur procesi i falimentit të shoqërisë së fluturimeve “Albanian Airlines”. Gjykata e Tiranës ka ftuar të gjithë kreditorët e kompanisë për një takim në datën 12 dhjetor, për t’i njohur me mënyrën si do shiten në ankand asetet e shoqërisë.
Shoqëria doli nga skena mes polemikash në vitin 2011, pasi Autoriteti i Aviacionit Civil i revokoi licencën, për t’u zëvendësuar në tregun shqiptar të fluturimeve nga Belle Air, edhe kjo kompani tashmë e familentuar.
Kompania u regjistrua në Shqipëri në vitin 1995 me emrin ”ALBANIAN AIRLINE MAK”, në pronësi të një grupi kuvajtian raporton Shqiptarja. Më pas i kaloi një kompanie turke, e cila pati probleme ligjore, për t’u kthyer përsëri te kuvajtjanët në vitin 2012.
Kërkesa zyrtare për falimentin gjithsesi është bërë shumë vonë, në vitin 2014. Kërkesa është pranuar nga autoritetet shqiptare vetëm në maj të vitit 2016, moment kur i është caktuar edhe një administrator falimenti./a.m.
