Një material informues i Komisionit të Mbrojtjes së Konsumatorit njofton të gjithë qytetarët se mund të reklamojnë te tregtarët mallrat që rezultojnë me defekte brenda një afati 2 vjeçar.
Sipas Komisionit, Ligji për mbrojtjen e konsumatorëve parashikon afatet kohore, brenda të cilave shitësi duhet të përgjigjet brenda 30 ditësh për defektet e sendit.
Ligji përcakton se shitësi përgjigjet për mospërputhjet që vërehen brenda afatit kohor të 2 viteve nga çasti i dorëzimit të mallit.
Në rast se e meta e sendit shfaqet brenda 6 muajsh, atëherë konsumatori nuk ka nevojë të provojë që e meta ekzistonte që nga çasti i dorëzimit të mallit.
Konsumatori thjesht duhet të provojë se e meta e sendit u shfaq në periudhën kohore brenda 6 muajve dhe nuk ka nevojë të provojë shkakun e të metës apo se kjo e metë i atribuohet shitësit. Barra e provës në këtë rast bie mbi shitësin.
Në rast se vërtetohen të metat e mallit, konsumatori mund të kërkojë riparimi, zëvendësimin, uljen e përpjesshme të çmimit, apo edhe anulimin e kontratës së blerjes.
Shitësi është i detyruar me ligj që çdo riparim apo zëvendësim ta kryejë brenda një periudhe të arsyeshme, të rënë dakord ndërmjet palëve, prej jo më shumë se 30 ditë kalendarike./Shqiptarja/a.m.
