Ndonëse deputeti i PS, Arben Ndoka ka dhënë dorëheqje nga mandati si deputet , dhe deputeti tjetër socialist Armando Prenga është në pranga, emri i tyre vijon të jetë në listën e anëtarëve të komisionit parlamentarë të Sigurisë Kombëtare. Në faqen zyrtare të Kuvendit, emrat e dy deputetëve vijojnë të jenë ende pjesë e përbërjes së këtij komisioni.
Praktikisht mësohet se drejtuesit e grupit parlamentarë të PS janë duke përzgjedhur 2 emrat, të cilët do të zëvendësojnë deputetët Ndoka dhe Prenga, me statusin e anëtarëve të përhershëm të komisionit parlamentarë të Sigurisë Kombëtare. Ndër emrat e deputetëve të PS që pritet të ulen në karriget e këtij komisioni, në vend të Ndokës dhe Prengës, është ai I Dashamir Pezës, Ulsi Manjës dhe Vexhi Muçmatës.
Këta tre deputetë të PS deri sot vijojnë të jenë si anëtarë zëvendësues pranë këtij komisioni. Por dy prej tyre pritet të kalojnë si anëtarë të përhershëm pranë këtij komisioni. Nga ana tjetër nuk përjashtohet fakti se në vend të Ndokës dhe Prengës të ulen dhe deputetë të tjerë të PS, ose të bëhen ndryshime në përbërje të komisioneve të tjera parlamanetare, me qëllim kalimin e 2 deputetetëve të PS nga një komision parlamentarë në komisionin e Sigurisë Kombëtare.
Mësohet se të enjten që vjen pritet të formalizohen edhe ndryshimet në komisionin parlamentarë të Sigurisë Kombëtare, duke zëvendësuar edhe zyrtarisht dy deputetët Ndoka dhe Prenga nga përbërja e këtij komisioni. (javanews.al / m.a)
