Kontestime të ashpra, akuza për gjyqtarët, madje edhe dhunë. Fundjava e kaluar e futbollit shqiptar u shoqërua me episode të shumta problematike, që krijuan volum të madh pune edhe për Komisionin e Disiplinës në Federatën e Futbollit. Aq sa vendimet për problemet disiplinore u shtynë me 24 orë, duke u publikuar vetëm pas mesditës së të enjtes. Masa ndëshkimore që nisin me dënimin e ashpër, për zyrtarin e klubit Tirana, Saimir Shehri. Pështyrja ndaj zyrtarit të ndeshjes në Kupë me Flamurtarin i kushtoi 24 muaj pezullim nga aktiviteti.
Në kampionat, për ndeshjen Skënderbeu-Tirana, dy klubet u gjobitën me 100 mijë lekë të reja secila për sjelljen e tifozëve. Disiplinori pezulloi me dy ndeshje trajnerin e Tërbunit, Viktor Gjoni dhe lojtarin Abaz Karakashi për protesta ndaj vendimeve të zyrtarit të ndeshjes në humbjen në shtesë me Teutën. Me dy ndeshje u pezullua edhe zv.trajneri i durrsakëve, Klodian Dervishi, për ofendim ndaj zyrtarëve të takimit.
Disiplinori dha masa të ashpra edhe për dhunën në Kategorinë e Dytë. Gramozi humbi në tavolinë përballjen me Domosdovën dhe do ti zhvillojë të gjitha ndeshjet e mbetura deri në fund të sezonit në fushë neutrale. Ekipit nga Erseka iu dënuan katër lojtarë, ku dy prej tyre deri në fund të sezonit. Mes të dënuarve për ngjarjen është edhe Josel Shtrepi i Domosdovës, pavarësisht se portieri ishte mes të dhunuarve në fushë.
Ndeshjen në tavolinë e humbi edhe Memaliaj përballë Tepelenës për dhunën ndaj gjyqtarit Shoshaj, ndërsa ekipi detyrohet të luajë katër takime pa spektatorë. Lojtari i Memaliajt, Denis Memo që cilësohet përgjegjës për goditjen e gjyqtarit u pezullua për dy vjet nga aktiviteti. Vendim i pazakontë ai rreth ekipit të femrave të Skënderbeut, që për mos paraqitje në ndeshjen me Vllazninë përjashtohet për dy vjet nga edicionet e ardhshme të Kupës së Shqipërisë për femra.
Supersport
