Nënkryetari i Komisionit Hetimor për zgjedhjet, Toni Gogu, ka shprehur qëndrimin e Partisë Socialiste në lidhje me zhvillimet në mbledhjem e ditës së sotme.
Gogu shprehet se kryetari i Komisionit, Enkelejd Alibeaj, injoroi të drejtën e maxhorancës për të paraqitur nenet e draft rregullores, duke mos marrë parasysh as rezultatin e votimit.
Nënkryetari i Komisionit thekson se partia Socialiste nuk do të lejojë imponimin e dhunshëm në Komisionin Hetimor dhe që ai të dalë nga udha e ligjshmërisë dhe përmbushjes së hetimit për të cilin është ngritur, pavarësisht provokimeve të opozitës.
Qëndrimi i nënkryetarit Toni Gogu:
Në shkelje të ligjit për komisionet hetimore (neni 10/1, 11/1, 13/2 dhe 24) dhe të rregullores së kuvendit ( neni 25/2 , 34, 38, 49, 50, 51, 71, 75 e në mënyrë të posacme të nenit 76, Kryetari i komisionit hetimor zoti Alibeaj, në mënyrë të përsëritur injoroi të drejtën e maxhorancës për të paraqitur propozimet e neneve të draft rregullores, deri në shkeljen flagrante të mos marrjes në konsideratë të rezultatit të votimit. Pas thirrjeve të vazhdueshme për të futur në shinat e ligjshmërisë procesin e votimit, u detyruam të kërkonim pushim sipas nenit 39/1, paragrafi 3. Ne mbetemi vullnetplotë për rifillimin në çdo moment të mbledhjes në respekt të plotë të Rregullores së Kuvendit.
Provokimit të vazhdueshëm për të nxjerrë komisionin nga udha e ligjshmërisë në përmbushje të funksionit të tij të hetimit e për ta kthyer në “foltore” nuk do i përgjigjemi kurrë pozitivisht.
Gjithashtu jemi të vendosur të mos lejojmë në asnjë moment në veprimtarinë e Kuvendit të Republikës së Shqipërisë, imponimin e dhunshëm të kulturës së tyre partiake të votimit./m.j
