Deputeti i Partisë Socialiste, Damian Gjiknuri, thotë se Komisioni Antikorrupsion i ngritur nga mazhoranca është një forum konsultimi dhe jo një instrument për të luftuar korrupsionin.
“Komisioni Antikorrupsion nuk është se do t’i japë zgjidhje. Ai më shumë është një forum konsultativ, sepse përgjegjësia për politikat e luftës kundër korrupsionit është e ekzekutivit kryesisht, është e qeverisë. Qeveria është ajo që njihet si partner nga Komisionit Europian. Dhe roli i komisionit këtu mund të jetë një rol këshillimor ndërpartiak, siç edhe e kanë theksuar të tjerët dhe me përfshirjen e shumë ekspertëve mbase jashtë suazës së qeverisë”, tha Gjiknuri në “Off the Record” me Andrea Dangllin në A2 CNN.
“Por jo se është komisioni ai që do të japë zgjidhje për luftën kundër korrupsionit, por do të jetë një forum i nevojshëm për të bërë një ballafaqim të politikave të qeverisë dhe angazhimeve të marra, me ato çka pret shoqëria në përgjithësi, sepse Parlamenti supozohet që është përfaqësues i interesave më të gjera, se sa thjesht interesave të ngushta të ekzekutivit”, shtoi ai.
I pyetur si ndihet ai personalisht për përfaqësuesit e mazhorancës ndaj të cilët janë nën hetim apo janë dënuar nga drejtësia e re, Gjiknuri u përgjigj: “Natyrisht që nuk më vjen mirë kur shoh kolegë, por edhe politikanë, që të mund të ekspozohet përballë këtyre masave, kur e meriton. Por nga ana tjetër, një gjë duhet të themi, ne pikërisht për këtë sistem luftuam. PS ka një meritë për shtyrjen përpara të reformës në drejtësi, me qëllim që politikanët të mos kenë më atë imunitetin absolut të pandëshkueshmërisë. Megjithatë, duhet të presim vendimet finale të gjykatave. Forcimi i gjykatave të pavarura do të bëjë që sistemi të jetë më i besueshëm”.
