Komisioneri McGrath pas takimit me Ramën: Shqipëria e ka vendin në BE, është në krye të procesit të anëtarësimit

Komisioneri evropian për Demokracinë, Drejtësinë, Sundimin e Ligjit dhe Konsumatorët, Michael McGrath, ka vlerësuar ecurinë e Shqipërisë në rrugën e integrimit evropian, duke e cilësuar vendin si një nga pararendësit kryesorë në procesin e anëtarësimit në Bashkimin Evropian.

Përmes një mesazhi të publikuar në rrjetet sociale pas takimit me Kryeministrin Edi Rama, komisioneri evropian nënvizoi se vendi ka bërë përparim të ndjeshëm, ndërsa kërkoi ruajtjen e ritmit të reformave kyçe.

Në reagimin e tij zyrtar, McGrath vuri theksin te reformat në sistemin e drejtësisë si kushti kryesor për konsolidimin e arritjeve të deritanishme.

“Isha shumë i kënaqur që u takova sot me Kryeministrin e Shqipërisë dhe artistin me përvojë, Edi Rama, për të diskutuar udhëtimin e anëtarësimit të Shqipërisë në BE. Ishte një mundësi për të përgëzuar Kryeministrin dhe qeverinë e tij për progresin e rëndësishëm të arritur deri më tani. Shqipëria i përket BE-së dhe është një nga vendet në krye të procesit të anëtarësimit,” u shpreh McGrath.

Komisioneri shtoi se megjithëse qëllimi përfundimtar është afër, mbetet ende punë për t’u bërë në terren për të garantuar që reformat të japin rezultate të qëndrueshme dhe të pakthyeshme.

Mbështetja e BE-së në hapat e ardhshëm

Sipas zyrtarit të lartë evropian, Bashkimi Evropian do të vijojë të mbështesë Shqipërinë në çdo etapë të procesit të negociatave.

“Diskutimi ynë sot u përqendrua në zbatimin e reformave të rëndësishme në drejtësi dhe sundimin e ligjit — spiranca politike e procesit të anëtarësimit. Ekziston një histori e fortë progresi dhe një ambicie e qartë. Tani, ky momentum duhet të ruhet për të dhënë rezultate të pakthyeshme,” përfundoi mesazhin e tij Komisioneri McGrath.