Komisionieri për mbrojtjen e të dhënave personale jep garancinë se ligji për masat shtesë të sigurisë publike, ku parashikohet vendoja e kamerave në biznese dhe ambiente publike, i mbron qytetarët.
Në një intervistë për Top Channel, Besnik Dervishi thekson se Ministria e Brendshme i ka reflektuar në draft të gjitha rekomandimet e komisionerit.
“Ne e kemi vlerësuar projektligjin. Në variantin e tij të parë projektligji paraqiste disa probleme për sa i përket mbrojtjes së të dhënave personale. Ndërkohë nga Ministria e Brendshme janë marrë në konsideratë të gjitha vërejtjet dhe sugjerimet e bëra nga zyra e komisionerit”, shprehet Dervishi.
Po në ligj sipas komisionerit, privatësia e qytetarëve sigurohet pasi të dhënat personale të përfituara nga xhirimet e kamerave mund të përpunohen vetëm për qëllime hetimore.
“Mbrojtja e të dhënave personale është një e drejtë kushtetuese. Përpara se të fillojnë mbledhjen dhe përpunimin e të dhënave personale duhet të njoftojnë zyrën e komisionerit dhe të regjistrohen në regjistrin që ka zyra e komisionerit. Gjithashtu është e parashikuar në ligj mënyra se si do të jepet informacioni. Në ligj është e përcaktuar, vetëm për nevoja hetimi, bazuar në Kodin e Procedurës Penale”, thotë komisioneri për të dhënat personale.
Ligji për masat shtesë të sigurisë publike pritet të votohet këtë javë në seancë plenare, ndërsa gjatë diskutimeve në komisionet parlamentare ai është kundërshtuar nga opozita.
TCH
