Në Malësi të Madhe kanë mbetur 8 kuti pa u numëruar. Gazetarja e Klan News, Emi Kalaja, raporton se komisionerët e koalicionit “Bashkë Fitojmë” kanë braktisur procesin dhe për këtë arsye nuk ka përfunduar plotësisht numërimi.
“Mendohet që në këto qendra të mbetura nuk e ndryshojnë rezultatin, mirëpo braktisja që është bërë nga komisionerët e koalicionit ‘Bashkë Fitojmë’ ka vonuar procesin”, raportoi Emi Kalaja.
Gazetarja u shpreh se janë përzgjedhur komisionerë të tjerë për të zhvilluar procesin, por edhe kjo do kohën e vet pasi duhen trajnuar.
Kryetari aktual i Bashkisë në Malësi të Madhe, njëkohësisht edhe kandidat, Tonin Marinaj është shprehur se deri në orën 12:00 të ditës së sotme mund të kemi një rezultat përfundimtar. Kujtojmë se ditën e djeshme PS-ja shpalli fitoren edhe në Malësi të Madhe.
/a.r
