Teksa mbrëmja e ndërrimit të viteve po troket, tryeza është një nga elementët më të rëndësishëm që kontribuon në atmosferën festive. Kjo është mundësia perfekte për të shprehur kreativitetin dhe për të krijuar një hapësirë që i bën familjarët të ndihen të veçantë. Në emisionin “Mirëmëngjesi Shqipëri” në RTSH, kuzhinieri Xhemal Hoxha ndau disa këshilla të vlefshme për përgatitjen e një tryeze festive që të jetë jo vetëm e shijshme, por edhe vizualisht tërheqëse.
Hoxha theksoi rëndësinë e kombinimit të shijeve dhe ngjyrave, duke sugjeruar që byreku dhe qofte mund të jenë me perime ose mish, sipas preferencës së amvisave.
“Antipastat duhet të jenë të thjeshta dhe të konsumohet brenda natës, pa i lënë për ditën tjetër”, tha ai.
Për të krijuar një atmosferë festive, ngjyrat e antipastave janë shumë të rëndësishme. Hoxha sugjeron përdorimin e mikseve të djathërave dhe proshutave për të krijuar kompozime të bukura dhe të shijshme, që plotësojnë atmosferën festive.
“Byrek, qofte me perime, me mish, sipas zgjedhjes se amvisave. Përveç shijeve të ndryshme që kombinohen janë edhe ngjyrat për t’i dhënë sa më shumë festë edhe tavolinës. Tryeza në raport me antipastat është zgjeruar vitet e fundit, ku në mikset e djathërave dhe proshutave luhet edhe me dekorin e tyre për ta bërë sa më shumë festiv.
Sallatat e ndryshme janë sipas dëshirës dhe të shumëllojshme, mund të përgatisim salca të ndryshme dhe kemi byrekë apo kroketa të ndryshme që mund të konsumohen të ngrohta. Amvisat duhet të luajnë me dekorin, në sallatat mund të luajë me ngjyrat si sallate jeshile, i shtohet panxhar, pomodorini, djathë të bardhë sipër, një salcë me ngjyrë që e bën jo vetëm të shijshme por edhe plot ngjyra.
Te mikset e djatharëve apo proshutave mund të kenë kombinime së bashku për dekor të bukur, te byrekët e ndryshme mund të ndryshojmë mbushjen e tyre, si me spinaq, me kungull dhe ngjyra e tyre i jep edhe më shumë atmosferë tavolinës”, tha kuzhinieri Hoxha.
Një tjetër sugjerim i rëndësishëm është të shmanget kombinimi i mishit dhe peshkut në një tryezë. Hoxha rekomandon që të shijohet veçmas gjeli i detit, një pjatë speciale që viziton tryezat tona vetëm një herë në vit.
“Mirë është që mishi dhe peshku të mos kombinohen së bashku dhe në këtë rast duhet t’i lihet hapësirë të shijohet gjeli i detit, i cili një herë në vit vjen në tryezat tona”, përfundoi ai.
Në fund, kuzhinieri përmendi se tryeza festive duhet të jetë një përvojë e plotë, ku shijet dhe pamja të bashkohen për të krijuar një atmosferë të paharrueshme për mysafirët.
