Ministri i Brendshëm Saimir Tahiri ka qenë këtë të martë për të inskeptuar zonën e Kombinatit, ku si pasojë e rrëshqitjes së dheut disa banesa janë vënë në rrezik. Ministri është shprehur se kjo është një situatë emergjente por që do merren të gjitha masat për të shmangur rrezikun e menjëhershëm.
‘’E gjithë stuktura shtetërore është këtu. Të gjithë punonjësit janë të angazhuar. Shteti është në këmbë për t’i ndihmuar dhe për të mos lejuar që të përballen vetë me këtë situata’’është shprehur Tahiri.
Prononcimi për media i ministrit të Punëve të Brendshme Saimir Tahiri:
Falenderoj të gjithë njerëzit që janë marrë me përballimin e kësaj situate të veçantë këtu në Kombinat.
Dhe t’i garantoj mbi të gjitha banorët që jemi këtu, nuk janë vetëm, dhe do marrim masa për të dhënë zgjidhje sa më shpejt. Pa toleruar asnjë neglizhencë që mund të sillte dhe pasoja.
Pyetje: Cili mund të ishte një parashikim afatgjatë për banorët?
Ministri Tahiri: Kjo është një situatë emergjente. Dhe si e tillë nënkupton marrjen e masave për të shmangur rrezikun e menjëhershëm. Më pas, paralelisht me këtë vjen faza e rehabilitimit.
Na duhet të rehabilitojmë zonën në mënyrë që rreziku i menjëhershëm të shmanget nga shtëpitë e banorëve dhe më pas duhet parë konkretisht çfarë lloj investimi duhet për të mos lejuar përsëritjen në të ardhmen – dhe këtë mund ta thonë ekspertët.
E rëndësishme është që banorët nuk janë vetëm.
E gjithë stuktura shtetërore është këtu. Të gjithë punonjësit janë të angazhuar. Shteti është në këmbë për t’i ndihmuar dhe për të mos lejuar që të përballen vetë me këtë situata.
Kohët e së kaluarës kur gjithësecili përballej vetë me hallet e veta, e jo vetëm me hallet e veta po dhe me hallet që i sillte natyra – kjo kohë ka përfunduar.
Sot ne jemi në krah të qytetarëve, për t’i ndihmuar dhe për të shmangur qe të ndodhin pasoja në shëndetin, jetën apo pasurinë e tyre.
ma.me
