Kombëtarja shqiptare ka humbur avionin për në Luksemburg, me të cilin do të përballet nesër. Kuqezinjtë, pas humbjes 2-1 me Austrinë zhvilluan dhe një seancë të fundit stërvitore në këtë vend në orët e para të mëngjesit dje, para se t’i drejtoheshin aeroportit të kryeqytetit austriak. Sipas një komunikate zyrtare të FSHF, shkak është bërë një neglizhencë nga ana e kompanisë “Lux Air”.
FSHF ka sqaruar se kombëtarja ka mbërritur në aeroport 1 orë e 30 minuta përpara fluturimit, sipas kohës së përcaktuar dhe pasi ishte kryer procesi i prerjes së biletave për pjesën më të madhe të ekipit dhe delegacionit, punonjësit e kompanisë kanë ndërprerë veprimet në mënyrë të njëanshme duke mos pranuar që të presin biletat dhe të kryejnë veprimet për pjesën tjetër të ekipit. Pas kësaj ngjarje të paprecedent, në Aeroportin e Vjenës, Federata Shqiptare e Futbollit do të ndjekë të gjithë hapat ligjorë për dëmtimin moral dhe financiar të shkaktuar nga kompania “Lux Air” e cila operon me “Austrian Airlines” dhe është e vendosur që t’i shkojë deri në fund kësaj çështjeje.
Pas kësaj ngjarjeje, drejtuesit menduan fillimisht të udhëtonin për në Luksemburg nëpërmjet një rruge alternative duke udhëtuar drejt aeroportit të Frankfurtit duke qenë se ky qytet nuk gjendet larg vendit ku do të luhet ndeshja jonë, por kjo mundësi mund të krijonte lodhje te futbollistët kuqezi ndaj drejtuesit vendosën që përfaqësuesja të kthehet në hotel dhe të udhëtojë drejt Luksemburgut, direkt nga aeroporti Schwechat i Vjenës këtë të hënë.
Supersport
