Komandanti i Bondstilit, koloneli me origjinë serbe, pret zgjidhje të problemeve me mjete politike.Komandanti i bazës ushtarake Bondstil, koloneli amerikan me origjinë serbe Nick Ducich, ka vlerësuar se situata në Kosovë është e qetë dhe e qëndrueshme, transmeton Gazeta Express.
Në një intervistë për “Veçernje Novosti” të Beogradit Ducich ka thënë se ushtarët e KFOR-it po bëjnë gjithçka për të garantuar ambient të sigurt dhe liri të lëvizjes së banorëve të Kosovës.
“Situata e sigurisë në zonën time është e qetë dhe te qendrushme. Për mendimin tim, problemet më të mëdha me të cilat ballafaqohet Kosova, e për çfare dëshmon edhe raporti i paradokohshëm i Komisionit Evropian, janë korrupsioni dhe krimi i organizuar”, ka thënë Ducich, duke shtuar se, sipas tij, me debat dhe dialog të njëmendtë, për çështjet politike sigurisht ekziston zgjidhje.
Ducich në intervistë ka folur edhe për kontaktet e tij të vazhdueshme me pjesëtarët e minoritetit serb në Kosovë, për të cilët ka thënë se ua di hallet e përditshme, si dhe për vizitën e parë që gjatë Pashkëve ortodokse para një muaji ia bëri Dioqezës së Pejës.
Ai thotë se i është gëzuar shumë kësaj vizite, ku është mahnitur “për tërë jetën” nga Dioqeza e Pejës, si dhe takimeve me politikanët, kryetarët e komunave dhe njerëzit e rëndomtë.
Ducich ka theksuar se, gjithashtu, u gëzohet edhe vizitave të ardhshme, që do t’i bëjë së shpejti, në Serbinë qendrore, ku edhe një herë do të takohet me përfaqësues të Ushtrisë së Serbisë, përgatiti ”Gazeta Express”. (b.an)
