Banorët e fshatit Qinam, në bashkinë e Kolonjës, qarku Korçë, janë ngritur në protestë këtë të shtunë, kundër projektit për instalimin e paneleve diellore në zonat e kullotave.
Gjatë protestës, banorët u shprehën se megjithëse bashkia ka zhvilluar disa takime informuese, vendimet e marra deri tani nuk reflektojnë aspak shqetësimet e tyre.
Fermerët thonë se as kryebashkiaku i Kolonjës, Erion Isai, nuk i merr parasysh shqetësimet dhe hallet e tyre (i marrë i pandehur nga SPAK edhe për tenderin e ujësjellësit).
Madje një prej banorëve, e ironizon, duke thënë se kryebashkiaku i tyre ka dhe ca virtyte të tjera që nuk janë normale.
“Jam fermer, kam 20 krerë lopë. Ky kryebashkiak që nuk i përshtatet një njerëzimi normal, se ka ca virtyte që nuk i përkasin një burri. Të jesh fermer dhe të kesh 20 lopë dhe të dënohemi ne si partiak, meqë jemi opozitarë, nuk na jepet subvencionin. Ka të tjerë që i kanë marrë edhe me një e dy lopë, kurse unë jo sepse jam i djathtë, jam i tillë, gjakun e kam blu, makinën blu nuk ndryshoj”, u shpreh një nga banorët.
“Ja po u bënë ato, ku do vemi ne. Të bëhen ato, të ikim e të mbytemi edhe ne, se s’kemi çfarë të bëjmë”, thotë një tjetër.
Ata theksuan se ndihen të përjashtuar nga procesi dhe të pambrojtur nga institucionet dhe askush nuk i dëgjon pavarësisht ankesave të përsëritura.
“Arat i kemi të ndara, këta duan të bëjnë panele diellore. Kemi e një pyll atje, kullotë, ata duan të bëjnë panele. Janë mijëra krerë që kullosin atje, mirë beharin e zgjidhim, po beharin? Ju lutemi që të mos na e marrin atë kullotën atje, ne malin e Gramozit kemi”, tregon një tjetër fermer i Qinamit.
Banorët kujtojnë se kullotat dhe arat që pritet të zëvendësohen me panele janë të ndara prej brezash mes familjeve të fshatit, dhe se aty kullosin deri në 4000 krerë bagëti, përfshirë 600 lopë.
Një prej banorëve shprehet:
“Unë kam 400 krerë, jam taksapagues i rregullt. Në dimër ku t’i çojmë kullotat ne, po mirë në behar, por në dimër nuk kam ku i çoj”.
Kurse një tjetër nënvizon se “po i varrosin”.
“Ne jemi një fshat pa emigracion, jetojnë këtu me tokën dhe bagëtitë, bujqësi e fermerë. Kur u ndanë toka u la e tillë kullotë se ishte mënyra e jetesës kjo, këta do e bëjnë me panele diellore. Ne jemi e një fshat pa hipotekë e tapi, asnjë gjë nuk na kanë bërë. Një pjesë janë fukarenj me atë ushqehen, po u zu dhe kjo njerëzit janë të varrosur, të mbaruar”, thotë ai.
Sipas tyre, heqja e këtyre sipërfaqeve do të paralizonte të gjithë ciklin bujqësor e blegtoral të zonës.
Një prej fermerëve u shpreh se vendosja e paneleve diellore mund t’i largojë përfundimisht edhe familjet fundit që mbështeten te blegtoria për të siguruar jetesën.
“Ne me këtë ushqehemi, kopenë e lopëve kam unë, me ato ushqehemi, me çfarë t’i mbaj fëmijët unë? Po u bënë panelet le të mbytemi, të mbarojmë fare, ne blegtori e bujqësi kemi”, tregon një prej fermerëve.
Banorët i bëjnë thirrje institucioneve për ndërhyrje urgjente, duke u shprehur se mbrojtja e kullotave është e vetmja mënyrë për të ruajtur ekonominë e fshatit.
