Në fshatin Petza’el, në zemër të Luginës së Jordanit, raportohet një tjetër incident që ka rritur tensionet mes kolonëve izraelitë dhe palestinezëve në Bregun Perëndimor.
Sipas raportimeve të mediave ndërkombëtare, dy javë më parë një grup kolonësh të rinj izraelitë kanë hyrë në një zonë arkeologjike pranë vendbanimit Petza’el dhe kanë nisur punime jozyrtare pastrimi dhe restaurimi. Gjatë këtyre veprimeve, ata dyshohet se kanë devijuar rrjedhën e ujit nga zona përreth, që sipas gazetës “Haaretz” mund të vijë nga infrastruktura e një fshati palestinez pranë Fasavil, duke mbushur një pishinë antike.
Ndërhyrja është kryer pavarësisht kundërshtimeve të ushtrisë izraelite, e cila megjithatë nuk e ka ndaluar aktivitetin. Kolonët nuk kishin autorizim nga zyrtari për arkeologjinë në Administratën Civile izraelite, institucioni që administron çështjet në Bregun Perëndimor.
Megjithatë, ata kanë falënderuar publikisht ministrin për Trashëgiminë, Amichay Eliyahu, një figurë e ekstremit të djathtë, i cili në të kaluarën ka bërë deklarata të debatueshme për konfliktin në Gaza dhe mbështet aneksimin e Bregut Perëndimor.
Vullnetarë janë organizuar përmes grupeve në “WhatsApp” për punimet dhe për ruajtjen e zonës gjatë natës. Në pamje të publikuara në rrjete sociale shihen të rinj duke u hedhur në ujë, ndërsa në zonë janë vendosur flamuj izraelitë dhe zhvillohen edhe tubime lutjesh.
Kolonët e kanë quajtur zonën “Pishina e Herodit”, duke iu referuar një sistemi të lashtë ujor që mendohet të datojë nga periudha e Mbretërisë së Judesë, megjithëse disa studiues e kundërshtojnë këtë interpretim.
Arkeologu Alon Arad ka kritikuar ashpër ndërhyrjen, duke e cilësuar të papranueshme përfshirjen e politikanëve në shkatërrimin ose transformimin e një siti të pa studiuar plotësisht, për qëllime turistike dhe ideologjike.
Ndërkohë, pronari palestinez i zonës ka deklaruar se kolonët kanë dëmtuar një tubacion uji për të devijuar rrjedhën, duke i lënë banorët pa ujë.
“Nëse e riparojmë, ata e shkatërrojnë sërish. Janë të rrezikshëm”, është shprehur ai.
