I fundit që ka braktisur Lulzim Bashën ka qenë zëvendëspresidenti i Partive Popullore Europiane, David McAllister, i cili deri më tani nuk pranon të jetë ndërmjetës i dialogut, ndërmjet opozitës dhe mazhorancës. Duke qenë që Partia Demokratike është pjesë e Partive Popullore Europiane, mendohej se ndihma dhe zëri i tyre do të ishin në favor të opozitës. Por siç edhe shihet ka ndodhur krejt e kundërta.
David McAllister nuk i është përgjigjur thirrjes së dyshes mazhoritare, Rama-Meta, të cilët kanë kërkuar që PPE të jetë ndërmjetëse e dialogut me opozitën dhe përfaqësuesin e saj kryesor, Lulzim Bashën.
Kryetari i Komisionit të Jashtëm në Parlamentin Europian, David McAllister, i përfolur si ndërmjetësuesi i një tryeze të mundshme mes kryeministrit Edi Rama dhe kreut të PD-së, Lulzim Basha, për gjetjen e një kompromisi nuk do të jetë në Tiranë, të paktën deri në fund të kësaj jave. Konfirmimi vjen nga zyra për shtyp e Parlamentit Europian.
Në përgjigje të interesit lidhur me një zgjidhje të mundshme që McAllister do t’i propozojë palëve në tryezë, zëdhënësi i PE-së është shprehur se fatkeqësisht, eurodeputeti nuk mund të japë komente të paktën deri në fund të kësaj jave. Sipas tij, McAllister është angazhuar në një tjetër detyre në Pakistan.
Përpjekja e faktorit ndërkombëtar për kapërcimin e situatës së vështirë ku gjendet politika shqiptare, vjen disa ditë pas apelit të Zv/Presidentes së Komisionit dhe Shefe për Politikën e Jashtme në BE Europian Federika Mogherini, si dhe komisionerit për Zgjerim Johanes Hahn, drejtuar opozitës.
Në ditët e fundit duket sikur po krijohet një rrethim demokratik ndërkombëtar kundër çadrës së protestës së PD. Shefja e politikave të jashtme të Bashkimit Evropian, Frederica Mogherini, lëshoi një mesazh të qartë kundër bojkotit, kundër pengimit të reformës në drejtësi dhe theksoi se moszbatimi i reformës po ngadalësonte integrimin e Shqipërisë.
Edhe personazhe të tjerë nga faktori ndërkombëtar kanë reaguar kundër bojkotit dhe protestës së opozitës si edhe ndaj kushtit të vetëm të saj, krijimin e një qeverie teknike. Me anë të Maja Koçijançiç, zëdhënëse e Komisionit Europian, BE theksonte se Parlamenti duhet të jetë funksional edhe për ecurinë e mëtejshme të zbatimit të Reformës në Drejtësi.
“Për ne, debati politik duhet të zhvillohet brenda parlamentit dhe jo jashtë tij. Polarizimi i mëtejshëm i arenës politike do të ishte vetëm kundër-produktive për ambicjen e Shqipërisë për t’iu bashkuar Unionit Europian, madje edhe për avancimin në rrugën e saj europiane”, tha ajo.
Ndërsa eurodeputeti i djathtë, Eduard Kukan, i cili në 21 shkurt do të shkruante në Tuitter se “opozita ka ende shumë punë për të bërë para zgjedhjeve, në Kuvendin e Shqipërisë. Bojkoti nuk e ndihmon atë t’i mbarojë këto punë”.
Duke i dhënë kështu Bashës një tjetër mesazh se është në rrugën e gabuar.Zëvendëskryetari i grupit të CDU-CSU në Parlamentin gjerman, Franz Josef Jung, i cili është njëkohësisht edhe shefi i politikës së jashtme në CDU, si dhe ish-ministër i Mbrojtjes së Gjermanisë i ka dërguar një letër Bashës.
Në letrën e tij, Jung shprehet në emër të CDU-CSU-së se “Vonesa e reformës në drejtësi dhe bojkoti i zgjedhjeve nga opozita do ta kthenin Shqipërinë shumë mbrapa në rrugën e saj drejt Bashkimit Europian dhe do të dëmtonte shumë marrëdhëniet mes PD-së dhe CDU-CSU”. Të gjitha këto deklarata tregojnë që opozita është krejtësisht e braktisur nga ndërkombëtarë
ma.me
