Koço Kokëdhima ka qenë ditën e djeshme në ambientet e UET-së, ku ka mbajtur një fjalim para studentëve të këtij universiteti.
Kokëdhima thotë se kur shkoi në PS në vitin 2013, gjeti një situatë të jashtëzakonshme.
“Unë jam i majtë me bindje dhe e njihja politikën, por para se të përfshihesha në politikë nuk e njihja politikën nga brenda.
Në 2013 që shkova në Partinë Socialiste si deputet ishte një situatë e paimagjinueshme për një njeri të biznesit: mjedisi ishte agresiv, nuk kishte qetësi, nuk mund të kishte takime që njerëzit të flisnin me normalitet me njëri-tjetrin, njerëzit ishin aq agresivë, shikoja njerëz që kapeshin për flokësh, kuti që fluturonin nga penxherja. Ishte një situatë e paimagjinueshme atje poshtë që tregonte se këta nuk qeveriseshin dhe nuk kishte mirëkuptim”, ka thënë Kokëdhima.
Ky ishte momenti që sipas tij imponoi vendimin për të bërë politikën e tij:
“Si njeri biznesi kur konstaton një problem, nuk qan as nuk ankohet, por planifikon një zgjidhje. Në shtator 2013 kam filluar këtë debat brenda partisë.
Si mund të kemi përgjigje për njerëzit për çdo çështje.
Ajo që më pengoi është kjo se Partitë politike në Shqipëri dhe baza e tyre, anëtarësia dhe qytetari i thjeshtë nuk kanë asnjë lidhje.
Ka një hendek aq të madh mes tyre saqë reflektohet dhe në qeveri. Po ashtu dhe qeveria është aq larg njerëzve, problemeve të tyre saqë duket i pamundur të mbyllet ky hendek”.
