Ministria e Mjedisit prezantoi të premten grantet konkurruese për zhvillimin e pyjeve, si dhe inventarizimin e tyre, projekt ky prej 4 milionë dollarësh financuar nga Banka Botërore si dhe qeveria suedeze.
Ministri i Mjedisit, Lefter Koka, i pranishëm në ceremoninë e prezantimit të projektit, theksoi se ky grant prej 4 milionë dollarësh do të jetë në mbështetje të moratoriumit të pyjeve. Sipas ministrit Koka, moratoriumi i pyjeve bëri të mundur që të mos priten rreth 5 mijë metër kub dru në ditë.
“Qëllimi ynë nuk është ndëshkimi i qytetarëve, por ndërgjegjësimi i tyre për mos prerjen e asnjë peme. Sot nuk kemi shifra të sakta të regjistrimit e inventarizimit të pyjeve. Nuk kemi pse heshtim e gënjejmë mbi shifrat e pyjeve. Ndaj në këtë program është përfshirë i inventarizimi i pyjeve”, deklaroi ministri i mjedisit Koka.
Grantet konkurruese për zhvillimin e inventarizimin e pyjeve me një total vlere prej 4 milionë dollarësh janë financuar nga Banka Botërore dhe qeveria suedeze, u shpreh Koka, duke shtuar se përfitues potenciale janë 260 shoqata pyjesh e 200 individë përdorues tradicional apo fermerë pyjesh.
“Procesi i grantit për shtimin e pyjeve kërkon të jemi sa më transparent dhe të kemi kontroll rigoroz. Duhet t’u tregojmë donatorëve se ne jemi qeveri e qytetarëve të ndërgjegjshëm dhe se çdo qindarkë që ata japin të shkojë në destinacionin e tij”, deklaroi Koka. (javanews.al / r.a)
