Familjarët e Aleks Nikës të vrarë në 21 Janar kanë shpresë se për ngjarjen do të vendoset drejtësi nga Gjykata e Strasburgut dhe Prokuroria e Posaçme.
Në një intervistë për Klan News, xhaxhai i tij, Mark Nika e konsideron të vështirë zbardhjen e vrasjes pas më shumë se 10 vitesh.
“Ajo është e vështirë për ta realizuar, por shpresën e kemi edhe nga ndërhyrja e Gjykatës së Strasburgut, e cila është në proces gjykimi. Besoj se ajo do të shkojë deri në fund si çështje për t’u hetuar”.
Sipas tij ka ardhur koha që të vihet drejtësi.
“Aleksi nuk do kthehet më në jetë, por ne na lehtëson si ngjarje për shkak se fëmijët e tij po rriten dhe kërkojnë, duan të dinë kush e vrau babain, pse e vranë dhe ata që e kanë kryer këtë akt të dënohen sipas ligjeve shqiptare”.
Ndërkohë edhe djali i Faik Myrtajt që mbeti i vrarë në 21 Janar 2011, shpreson që dosjen ta marrë SPAK.
“Shpresojmë që çështjen e Aleks Nikës si dhe të tre personave të tjerë ta marri SPAK. Kjo është shpresa jonë”.
Prokuroria e Tiranës vendosi që të rinisë hetimet për vrasjen e Aleks Nikës dhe Hekuran Dedës si dhe plagosjen e 6 personave të tjerë gjatë protestës./ Klan News
g.kosovari
