Korpusi i ri i ndryshimeve te Kodit te Procedurës Penale ka kaluar jo me vëmendjen e duhur, kjo dhe për shkak të zhvillimeve të fundit politike. Sipas ekspertit të nivelit të lartë, njëkohësisht dhe dekanit të fakultetit të drejtësisë Artan Hoxha, rishikimet do të sjellin një praktikë krejt të re të proceseve penale, por dhe funksionimit të Prokurorisë, e cila tashmë është decentralizuar. Mes shume ndryshimeve është dhe kërkesa per gjykim te shkurtuar. Në jo pak procese persona të akuzuar për krime të rënda kanë përfituar nga gjykimi i shkurtuar. Por tashmë neni 403 i Kodit të Procedurës Penale ka ndryshuar tërësisht.
“Me ndryshimet që i janë bërë kodit, nuk lejohet gjykimi i shkurtuar për veprat penale që parashikojnë dënim, ndër të tjera edhe dënimin me burgim të përjetshëm. Do të thotë që ata persona që kanë kryer vepra penale të cilat parashikojnë dënim përjetë, atëherë gjykimi i shkurtuar nuk është i aplikueshëm.”-tha dekani i Fakultetit të drejtësisë Hoxha.
Risi të tjera janë dhe elementët e shtuar për seancën e gjykimit paraprak apo dhe dispozitat për marrëveshjen.
“Ne kemi futur dy gjykime të reja të posaçme, që është urdhëri penal për kudravajtjet penale, gjykimi me marrëveshje që përcaktohet përmes prokurorit dhe të pandehurit… mënyra e përfundimit të hetimeve paraprake, që ka të bëjë me futjen e një figure të re, që është gjyqtari i seancës paraprake i cili kontrollon të gjithë veprimtarinë që është zhvilluar nga prokurori dhe nevojës ose jo të kalimit të çështjes për gjykim.”-tha Hoxha.
Për sa i përket debatit mbi rishikimin e vendimeve të pafajësisë Hoxha thotë, se mendimi juridik është i ndarë.
“Europa ka zgjidhje të ndryshme,. Ka shtete që e pranojnë rishikimin e vendimeve të pafajësisë, ka shtete që nuk e bëjnë, duke dashur të garantojën që procesi penal të ketë një fund, që siguria juridike ka rëndësi për vetë procesin dhe shoqërinë…”- u shpreh Hoxha.
Ndryshime rrënjësore ka pësuar edhe Kodi Penal. Mes tyre janë vendimet, te cilat parashikojnë deri ne dy vite heqje lirie, për te cilat tashme do te aplikohet mase administrative gjobe apo dënim alternativ./VizionPlus
