Pas reagimit të kreut të grupit parlamentar të Partisë Socialiste, Taulant Balla në lidhje me kthimin nga Presidenti Ilir Meta të ndryshimeve të bëra nga Kuvendi mbi Kodin Penal, ka ardhur serish një sqarim i dytë nga Presidenca përmes zëdhënësit, Tedi Blushi.
Ky i fundit regon se halli kryesor i numrit dy të Partisë Socialiste Taulant Balla nuk është ky projektligj, por kthimi i një tjetri ( nuk e specifikon), i cili sipas tij do të publikohet në media nesër nga zyra e Kreut të Shtetit.
Në argumentimin e mëparshëm të Presidentit të Republikës, Ilir Metës thuhet se disa nene janë abstrakte dhe duhet ndërhyrje urgjente për t’i rishikuar ato, pasi për ndryshe, miratimi i tyre në këtë formë nga Kuvendi i Republikës mund të prodhojë rrezikshmëri të madhe për jetën e qytetarëve.
Reagimi i zëdhënësit të Metës, Tedi Blushi:
Që t’i dhimbsen policët Tao Taos, kjo është një shaka që përmbys së qeshuri të gjithë pushuesit në plazh, të cilët e dinë veprimtarinë e tij plot bëma kundër ligjit dhe në shërbim të të fortëve.
Presidenti i ka vlerësuar qëllimet pozitive të ligjit në parim, por i ka rikthyer ndryshimet e propozuara në Kodin Penal për t’u bërë përmirësimet e domosdoshme për zbatim efikas.
Në kushtet kur Tao Tao drejton opozitën në Parlament dhe kur Tao Taot kanë bllokuar prej dy vitesh Gjykatën Kushtetuese, është detyrë e Presidentit të shqyrtojë me rigorozitet maksimal çdo ligj, me qëllim përmirësimin e tyre si në rastin konkret.
Por halli kryesor i Tao Taove nuk është ky projektligj, por projekligji tjetër që është kthyer dhe që do publikohet nesër. Pakica që nuk njeh rotacion, jo vetëm që nuk ia prish pushimet malore Presidentit me kërcënimet e saj të lodhura, por e frymëzon për të ngjitur maja më të larta në ditët që vijnë. Ndërsa përsa i takon shtatorit, Presidenti është besimplotë se do ta gjejë në Majën më të lartë, atë të Korabit.
*-*
