“Nëse do të flisnim për një qëndrim moral, atëherë bota do të ishte shumë më e mirë dhe thuajse perfekte pa armë. Dhe i qëndroj kësaj ideje. Për ironi të fatit një njeri që është kundër armëve vjen dhe bëhet ministër Mbrojtjeje, e i duhet të merret pothuajse çdo ditë me armët. Gjithsesi arma nuk ka qenë diçka e huaj për mua. Unë i takoj atij brezi që kam bërë zbor…”, thotë Kodheli me MAPO, interviste qe eshte e plote ne kete reviste.
Në një intervistë të gjatë për Revistën Mapo, ajo rrëfen 4 vitet e saj në krye të ministrisë, çfarë gjeti dhe çfarë beson se po lë?! Cilat ishin raportet e saj me gjeneralët?! Gjendjen e ushtrisë shqiptare sot dhe a jemi në gjendje të mbrojmë veten?! “Replika” me ministrin grek të Mbrojtjes dhe situata politike në vend? Në një zyrë të zbukuruar me suvenire ushtarake, Kodheli thotë se është në paqe me atë që ka arritur në politikë dhe se nuk është duke kërkuar të marrë më shumë.
Si një prej 7 grave që drejtojnë ministritë e Mbrojtjes në NATO, “një rekord”, siç na thotë, ajo është modeste t’i njohë vetes merita të thyerjes së tabuve gjinore. Pranon se në asnjë moment drejtimi i ministrisë nuk ka qenë një çështje gjinie, edhe pse siç thotë duke qeshur “koha e zborit”, e kishte ndihmuar që të mos ndjehej e huaj në poligon.
E megjithatë ajo i dha ushtrisë një fytyrë më civile duke e angazhuar deri në mbjellje pemësh apo pastrim shtretërish lumenjsh, gjëra për të cilat u lavdërua dhe kritikua, ndërsa vijon të besojë në një rol të shtuar të ushtrisë në ndihmën ndaj civilëve sidomos në raste emergjencash. Përndryshe edhe në politikë, megjithëse mbron fort pozicionet e Partisë Socialiste në krizën e fundit, ajo ngulmon në kërkesën për më pak “luftë”.
“Po nuk u zhveshëm, çdo ditë e më tepër, nga pasioni politik i të qenit armiq me njëri-tjetrin ditën e zgjedhjeve, historia e zgjedhjeve do të vazhdojë të jetë një histori e trishtë. Dita e zgjedhjeve duhet të jetë një festë mbarëkombëtare ku fiton ai që është më i mirë dhe ai që është më i besueshëm”, tha Kodheli. Madje edhe sa i përket zhvillimeve në rajon apo botërore, ministrja e Mbrojtjes është më “e paqtë” se kolegu Ditmir Bushati apo edhe kryeministri Edi Rama edhe pse e vetëdijshme për “lojën” politike mbi Ballkan.
ma.me
