Nënkampionia e Evropës në 3000 m me pengesa, Luiza Gega, ka marrë një surprizë nga kolegët e saj të Policisë Ushtarake dhe ministrja e Mbrojtjes, Mimi Kodheli.

Nëpërmjet një deklarate për mediat nga ministria e Mbrojtjes sot pasdite, bëhet e ditur se “Ministrja Kodheli dhe efektivët e Policisë Ushtarake kanë vizituar atleten në fshatin turistik të Dardhës ku po stërvitet në prag të Lojërave Olimpike Rio 2016. Me rastin e shpalljes nënkampione e Evropës, pjestarja e Forcave të Armatosura është nderuar nga ministrja Kodheli me Medaljen e Mirënjohjes për kontributin dhe vlerat e veçanta në shërbim të lartësimit të figurës së ushtarakut të Forcave të Armatosura, brenda dhe jashtë vendit.

Ministrja Kodheli e shoqëruar nga deputeti i Kuvendit të Shqipërisë, Ilir Pendavinji, përgëzoi atleten për rezultatin e shkëlqyer që arriti në Kampionatin Evropian, si dhe i uroi asaj suksese në Lojërat Olimpike Rio 2016. Rekordmenia absolute e Shqipërisë Gega falenderoi kolegët dhe ministrinë e Mbrojtjes për mbështetjen si dhe personalisht ministren Kodheli, e cila siç u shpreh atletja, ka qenë zyrtarja e parë e cila e ka uruar, jo vetëm këtë herë, por edhe për arritjet në aktivitetet e tjera.

Ministrja Kodheli siguroi se mbështetja e ministrisë së Mbrojtjes për nënkampionen e Evropës, do të vazhdojë të jetë maksimale dhe e konsideroi Luizën si përfaqësuesen më të denjë të Shqipërisë dhe FA shqiptare.

Luiza Gega, nënkampionia e Evropës, do të mbajë flamurin shqiptar në ceremoninë e hapjes së Lojërave Olimpike “Rio 2016” që do të zhvillohen nga data 5 deri 21 gusht./atsh/a.k