Ministrja e Mbrojtjes, Mimi Kodheli inspektoi sot punimet për ndërtimin e urës “bailey”, në Sylbicë të Tropojës, e cila do të lidhë 6 fshatra. Ministrja Kodheli theksoi se qeveria, ministria e Mbrojtjes dhe Forcat e Armatosura janë në shërbim të shqiptarëve.
“Ikni bëni turizëm në bjeshkët e Tropojës. Te Polinat e Bardha, mbi lumin Shipshan që pengonte rrugën për në bjeshkë, Forcat e Armatosura të Shqipërisë ndërtuan një urë “bailey”, që veç banorëve të 6 fshatrave të kësaj krahine të mrekullueshme, i shërben më së shumti zhvillimit të turizmit dhe rrjedhimisht krejt zonës”, shkruan ajo në rrjetin social “Facebook”.
Ndërtimi i urës me peshëmbajtje 18 ton mundësoi edhe hapjen e rrugës, deri dje shteg që përshkohej vetëm në këmbë.
Ministrja vlerësoi se ky është shembulli më i mirë i bashkëpunimit mes FA-së, pushtetit lokal dhe mbi të gjitha malësorëve atje.
