E ftuar në emisionin “Fol me mua fol me ata” në TVSH, ministrja e Mbrojtes Mimi Kodheli tha se ka çuar në prokurori 20 dosje të Ministrisë së Mbrojtjes, për shkelje gjatë qeverisjes “Berisha”.
Por sipas saj prokuroria nuk ka ardhur asnjëherë në Ministrinë e Mbrojtjes për të pyetur nëse kanë prova, ndërkohë që prokuroria i ka mbyllur çështjet për mungesë provash.
Kodheli ritheksoi se për këtë arsye e qindra të tjera ku perfshihen ato me kryesoret, Gërdeci dhe 21 janari, është i domosdoshëm vetingu.
Përsa i përket çështjes së zgjedhjes së presidentit ministrja Kodheli tha se Partia Socialiste dëshiron president konsensual dhe pse i kanë votat për ta zgjedhur vetë atë.
E pyetur nëse do të jetë emri i saj si kandidate për presidente, zonja Kodheli tha se ajo nuk është vetëofruar asnjëherë, pavarësisht se mediat e kanë përcjell si vetëofrim deklaratën e saj ku shprehej se në Shqipëri ka shumë burra dhe gra të denjë për president.
Ministrja e Mbrojtjes shtoi se Partia Socialiste nuk ka diskutuar për asnjë emër konkret për president, por vetëm për proces.
Ministrja e Mbrojtjes, njëherësh anetare e forumeve drejtuese të PS-së, Mimi Kodheli, nuk e perjashton, madje e sheh si zgjidhje një koalicion me bazë të gjerë PS-PD.
Megjithatë, ajo thotë se referuar nivelit të demokracisë në Shqipëri, kjo është një zgjidhje disi e pamundur.
Ajo thotë se koalicioni me bazë të gjerë është karakteristikë e vendeve me demokraci të konsoliduar.
Kodheli nuk e sheh si përpjekje për të goditur LSI-në, por si një zgjidhje për krizën.
Kodheli theksoi se LSI ka një pozicion mjaft të rëndësishem si ekuilibruese e dy forcave të mëdha politike.
Gjatë emisionit “Fol me mua fol me ata”, ministrja e Mbrojtjes Mimi Kodheli foli dhe për veshjen si ushtarak të ministrit të Mbrojtjes së Greqisë, Panos Kamenos, duke e konsideruar si një gabim dhe pa sens qëndrimin e homologut të saj grek.
“Veshja si ushtarak e tij nuk ka sens, por besoj se ka qënë një sjellje për konsum të brendshëm politik”- tha Kodheli
“E kam takuar ministrin Kamenos në ministerialin e shkurtit ku e kam pyetur nëse ishte qetësuar qysh atëhere kur doli si ushtarak.
Ai e kuptoi pyetjen time dhe me delikatesë me tha “po jam qetësuar””, vijoi Kodheli.
Pak muaj me parë ministri i Mbrojtjes së Greqisë, Panos Kamenos u shfaq i veshur si ushtarak në kufi me Shqipërinë duke folur me nota kërcenuese.
Ndërkohë, e pyetur mbi mardhëniet Shqipëri-Greqi ministrja Kodheli tha se mardhëniet janë me shumë sesa korrekte, si duhet të jenë dy vende antare të NATO-s
c.a
