Ministrja e Mbrojtjes, Mimi Kodheli priti sot në një takim pune zëvendësndihmës sekretarin amerikan të Mbrojtjes, Michael Carpenter.
Ministrja Kodheli shoqërohej në këtë takim nga shefi i Shtabit të Përgjithshëm të FA-së, gjeneralmajor Jeronim Bazo. Ajo rikonfirmoi angazhimin e vendit tonë në Task- Forcën e Gatishmërisë Shumë të Lartë, (Very High Readiness Joint Task Force, VJTF) me një kompani këmbësorie përtej vitit 2018. Në këtë kuadër, ministrja Kodheli e njohu z. Carpenter me stërvitjet e përbashkëta në të cilat Forcat e Armatosura të Shqipërisë kanë marrë pjesë kohët e fundit.
Një tjetër temë e takimit ishte edhe angazhimi i Shqipërisë në misionin e NATO-s Resolute Support, për të cilin ministrja Kodheli shprehu vendosmërinë e vendit tonë për vijimin e këtij kontributi, madje duke e dyfishuar pjesëmarrjen në këtë mision. Kontingjenti shtesë i paqeruajtësve shqiptarë në Afganistan pritet të shërbejë në Herat nën komandën e Forcave të Armatosura italiane.
Gjithashtu, ministrja Kodheli e njohu Carpenter për pjesëmarrjen e Shqipërisë me një anije në operacionin e NATO-s në Detin Egje, në mbështetje të Frontex, agjencisë së BE për ruajtjen e kufijve.
Të dy personalitetet diskutuan për situatën e sigurisë në Siri dhe Irak dhe përpjekjet që koalicioni ndërkombëtar, ku bën pjesë edhe vendi ynë, po bën kundër Daesh.
Situata në rajon, ishte një tjetër pikë e diskutimeve. Dy bashkëbiseduesit vlerësuan iniciativat e përbashkëta të vendeve të Ballkanin Perëndimor.
Ministrja Kodheli theksoi se Shqipëria ishte një nga vendet e para që ratifikoi në Kuvend Protokollin e Pranimit të Malit të Zi në NATO, duke treguar kështu frymën e bashkëpunimit mes dy vendeve dhe duke mbështetur politikën e dyerve të hapura të Aleancës.
Znj. Kodheli e njohu zyrtarin e lartë amerikan me hapat e mëtejshëm që Shqipëria po ndërmerr për ngritjen e Qendrës së Ekselencës së NATO-s për studimin e fenomenit të luftëtarëve të huaj, si dhe vlerësoi maksimalisht punën e bërë nga Zyra e Bashkëpunimit Ushtarak (ODC) në Tiranë, që nëpërmjet projekteve të shumta, ndihmon në trajnimin dhe modernizimin e Forcave të Armatosura të Shqipërisë.
Vizita e zëvendësndihmës sekretarit amerikan të Mbrojtjes, Michael Carpenter vjen menjëherë pas mbylljes së punimeve të Samitit të NATO-s në Varshavë dhe në kuadër të vizitës që ndihmëssekretarja amerikane e Shtetit, Victoria Nuland po zhvillon në Tiranë
