Ish-deputeti socialist, Koço Kokëdhima, ka reaguar sot në Facebook duke komentuar shkurtimisht vendimin e Gjykatës Kushtetuese. Në postimin e tij, Kokëdhima shkruan se do të presë vendimin e arsyetuar për të kuptuar më mirë arsyet e vendimit.
Kokëdhima e cilëson tërësisht politik procesin gjyqësor ndaj tij, ndërsa falenderon mbështetësit për solidaritetin e treguar.
“Me apo pa mandat, unë do punoj pa reshtur për ju” – u adresohet socialistëve të Vlorës, Koço Kokëdhima.
Postimi i plotë:
Për miqtë dhe mbështetësit
Sot Gjykata Kushtetuese vendosi pranimin e kërkesës së PD për konstatimin e papajtueshmërisë së mandatit tim të Deputetit. Nuk do të bëj asnjë koment rreth vlerësimeve tona për integritetin e Gjykatës, profesionalizmin apo për influencimin e saj në këtë proces tërësisht politik, qysh në nisjen e tij 2 vjet më parë. Do te presim vendimin e arsyetuar, për të kuptuar më mirë dhe plotësisht natyrën e këtij gjykimi. Në këto orë, kam marrë qindra mesazhe nga të gjitha anët e Shqipërisë, por veçanërisht nga socialistët e bazës dhe mbështetësit e Partisë Socialiste, nga miqtë dhe të njohurit e mi. I falenderoj nga zemra për solidaritetin e treguar. Me apo pa mandat Deputeti, unë do të punoj pa u reshtur për Ju dhe për një Shqipëri më të mire. Gjithe jetën time kam punuar me pasion për nje jetë më të mirë jo vetëm për familjen time. Rruga ime në politikë nuk mbaron këtu. Ajo është vetëm në fillimet e saj.
