Ministrja e Brendshme Albana Koçiu ka qenë në Kurbin, ku ka inspektuar nga afër, lirimin e një hapësire publike në këtë zonë. Së bashku me të, ishin edhe drejtori i Përgjithshëm i Policisë Ilir Proda, si dhe kryetarja e Bashkisë, Majlijnda Cara.
Në zonë, është liruar një hapësirë, që më herët është përdorur për të grumbulluar makina të vjetra ose jashtë funksionit.
“Në fakt, është një nga pikat e grumbullimit që Policia e Shtetit ka përdorur prej vitesh, për të depozituar gjithë ata mjete motorike, që janë sekuestruar apo konfiskuar. Pika të tilla kemi me dhjetëra, të shpërndara në territor, në mbarë vendin dhe falë aksionit që kemi ndërmarrë me një sërë agjencish të Ministrisë së Brendshme, kemi nisur seleksionimin e të gjithë këtyre mjeteve të depozituara këtu prej vitesh, për ta kthyer në një hapësirë publike,në shërbim të komunitetit”, tha Koçiu.
Ministrja shtoi se hapësira në fjalë do të lirohet e do i jepet Bashkisë së Laçit, për të bërë investime dhe projekte, që kanë vlerë të madhe për qytetin.
Drejtori i Policisë së Shtetit, Ilir Proda, deklaroi se forcat e rendit janë tashmë të angazhuara në një operacion për të rimarrë kontrollin e një zone që, sipas tij, është shndërruar në një “gangrenë” për qytetin.
“Ky është një operacion që ka filluar në bashkëpunim me policitë bashkiake. Përveç aktit që këto pika janë kthyer në gangrena, këto pika kërkojnë dhe shërbime policie për t’u ruajtur dhe për të garantuar sigurinë fizike të tyre. Kjo është një nga 24 pikat në Shqipëri dhe është një nga pikat më të mëdha të grumbullimit”, tha Proda.
Ndërsa, kryetarja e Bashkisë së Kurbinit Majlinda Cara, u shpreh se tashmë bashkia është e përgatitur për të hartuar projekte të reja, të cilat do të realizohen në këtë zonë që do t’i vihet në shërbim komunitetit.
Aksioni vjen paralelisht edhe me aksionin që Inspektorati Kombëtar i Mbrojtjes së Territorit dhe inspektoratët vendore, janë duke kryer, për lirimin e hapësirave publike.
