Kryetari i Partisë Demokratike Lulzim Basha ka komentuar zhvillimet e fundit në politikën shqiptare në studion e emisionit Studio e hapur në News 24 me fokus reformën në drejtësi, vettingun, marrëdhëniet me Ilir Metën por edhe çështjet e tjera të aktualitetit politik.
Kryetari i Opozitës ka komentuar edhe mundësinë e një koalicioni me Ilir Metën, që në periudhën e miratimit të reformës në drejtësi, u duk mjaft pranë me opozitën. Ai lë të hapur çdo mundësi, por duke vendosur një sërë kushtesh që sipas tij duhet të plotësojë çdo forcë që i bashkohet koalicionit opozitar.
“Koalicioni i Partisë Demokratike duhet të përmbushë dy vlera, ti bashkohert platformës sonë, të dhënies pushtet qytetarit shqiptar, përmes transparencës dhe përgjegjshmërisë. Çështja e dytë ka të bëjë me luftën kundër krimit dhe drogës. Çdo parti që përfshin kufizimin e pushtetit, fuqizimin e qytetarit është i mirëpritur. A është zoti Meta kryetar i një partie që është kundër drogës? Ai i përmbush këto kushte? Jam i vendosur ti prij një koalicioni vlerash. Kush i bashkohet këtij koalicioni me vepra, dhe jo me fjalë ëhstë i mirëpritur”, tha Basha.
Tensionet me ambasadorët
Kreu i PD ka folur edhe për tensionet me ambasadorët gjatë procesit dhe negociatave për reformën në drejtësi, teksa tha se “tensionet në momente të caktuara ishin më të larta nga sa mendohet”.
“Ka patur shumë momente të tensionuara, aq të tensionuara sa nuk jua pret dot mendja. Por marrëdhëniet personale i kemi të shkëlqyera”, tha ai.
Zgjedhje në Dibër
Në lidhje me zgjedhjet për bashkinë Dibër, Lulzim Basha tha se mazhoranca po bën gjithçka për të marrë bashkinë përmes presioneve të krimit. Ai ka sulmuar edhe kandidatin Muharrem Rama kur tha se ai u caktua nga krimi.
“Këto zgjedhje janë zgjedhje të dibranëve. Vijnë në një moment kyç për Shqipërinë. Unë kam qenë në Dibër të paktën 3 herë, u ktheva në Dibër mbrëm. Probleme të tmerrshme sa i përket varfërisë. Këto janë edhe zgjedhje ku vendosen përballë jo thjesht dy kandidatë. Ata duan të zgjedhin një kukull që nesër krimi të bëjë emërimet, që tenderat t’i marrin si po i merr sot Sadri Abazi. Kemi qeverisje që ka bërë pakt me krimin për të qëndruar në pushtet. Ne do tu kthejmë pushtetin qytetarëve. Dibranët masivisht po zgjedhin që pushtetin në fuqi ta ndalin. Kandidaturën aktuale të të majtës e nxori krimi nga shtëpia me pizhama për pazaret.
Ai tha se çdokujt që synon manipulimin “do t’i duket grykë topi”.
Reforma në Drejtësi
Sa i takon miratimit të ligjit të vettingut në mënyrë të njëanshme Basha tha se opozita do ta çojë atë në Gjykatën Kushtetuese. Ai tha se e njëjta rrugë do ndiqet edhe me ligjet e tjera nëse nuk janë në përputhje me kushtetutën e miratuar në 22 Korrik me konsensus.
“Ne jemi jashtëzakonisht të lumtur që reforma në drejtësi erdhi në përmbajtjen e saj në një cilësi evropiane falë insistimit tonë. Që askush mos të ketë në dorë të influencojë në gjyqësor. Ndonëse mazhoranca është zotuar për konsensus për 7 ligjet nga 39 që janë gjithsej, ata hodhën poshtë propozimet tona. Ne do ndjekim gjithë rrugët që ky ligj, dhe çdo ligj të jetë në përputhje me kushtetutën. Sa i takon ligjeve të tjera ne si opozitë do vijojmë punën tonë. Në qoftë se pala tjetër refuzon konsensusin ne do mbajmë qëndrimet tona rast pas rasti. Ka mjaftueshëm kohë të shkojmë me ligje kushtetuese. Tu japim shqiptarëve atë që votuam së bashku në 22 Korrik”, tha Basha.
Ankesat e maturantëve
Basha komentoi edhe ankesat e maturantëve për procesin e konkurimit për në universitetete, teksa tha se shumë prej atyre me rezultate të larta u është mohuar vijimi i studimeve. Basha kërkon dorëheqjen e ministres së Arsimit që sipas tij ka zhytur në kaso arsimin.
“Të ndalet menjëherë ky proces abuziv që po u heq maturantëve me rezultate të larta të drejtën e studimit për atë degë që ata kanë sakrifikuar. Kush ua heq këtë të drejtë? Rastet janë masive. Ministrja e Ramës ka dështuar të japë transparencë. Aktet nënligjore kanë shkaktuar një kaos. Të shkarkohet që nesër ministrja e Arsimit. Është më e paaftë, edhe më e padenjë”, tha Basha.
/a.m.
