Klubet e Superiores u mblodhën sot nën ombrellën e Ligës Profesioniste, ku diskutuan situatën e bojkotit dhe negociatat me qeverinë, për katër kërkesat e tyre, të zyrtarizuara prej dy muajsh tashmë. Pas mbledhjes nuk u dol me një vendim, sepse presin një përgjigje zyrtare nga Ministria e Financave për kërkesat e tyre, sidomos për ligjin e sponsorizimit. Është lënë një takim tjetër të premten mes presidentëve të Superiores, për të diskutuar dhe marrë vendim nëse do të fillojë kampionati apo do të vazhdohet me bojkotin. Presidenti i Ligës Profesioniste, Edvin Libohova, dha këto sqarime për mediat:
“Ridiskutuam edhe njëherë situatën. Prisnim ditën e premte një përgjigje nga Ministria e Financave, që akoma nuk e kemi zyrtarisht. Ndërkohë, duke vlerësuar edhe takimin e zotit Duka me kryeministrin dhe sinjalet pozitive që kanë ardhur nga ky takim, Liga doli në konkluzionin që ne do të presim deri ditën e enjte, nëse do të kemi një përgjigje pozitive zyrtare nga qeveria, për t’u mbledhur pastaj përsëri për të diskutuar për vazhdimin apo jo të bojkotit.
Fillimi i futbollit do varet nga vendimi që do të marrë qeveria. Mungesa e përgjigjes zyrtare? Nuk e dimë, jemi duke e pritur. Nuk ka ngërç, po presim përgjigjen. Presidenti Duka ka diskutuar me kryeministrin dhe takimi ka qenë pozitiv. Nuk kemi detaje, nuk ka pasur vendimmarrje, ka qenë takim për të shkëmbyer mendime. Sezoni nuk rrezikohet asnjëherë. Nuk është diskutuar asnjë formulë e re, pritet vendimmarrja e madhe. Besoj se të premten do të mblidhemi përsëri për të vendosur“.
/a.r
