Në kuadër të vizitës zyrtare në Finlandë, Ministri i Mirëqënies Sociale dhe Rinisë Blendi Klosi u takua me Ministren e Çeshtjeve Sociale dhe Shëndetit, Hanna Mantayla, si dhe me Ministren e Arsimit të këtij vendi, Sanna Grahn-Laaksonnen.
Në takimin mes ministres së Çeshtjeve Sociale dhe Shëndetit Mantayla dhe ministrit Klosi, u vu theksi tek zgjerimi i bashkëpunimit mes dy vendeve në fushën e politikave sociale, si dhe shkëmbimimi i eksperiencave në këtë fushë. Ministri Klosi bëri një panoramë të reformave që po ndërmerr Shqipëria në fushën e politikave sociale, duke vënë theksin tek ndryshimet rrënjësore që po ndërrmerren në këtë sektor. Duke bërë një përshkrim të reformimit të ndihmës ekonomike, reformës së PAK si dhe reformën e sistemit të sigurimeve shoqërore, Ministri Klosi kërkoi njohjen e pensioneve për shqiptarët që kanë ndarë vitet e punës, mes Shqipërisë dhe Finlandës. Ai kërkoi gjithashtu mbështetjen e Finlandës për njohjen e pensioneve nga të gjitha vendet nordike. Duke përgëzuar Shqipërinë për këto hapa të rëndësishëm, Mantayla shprehu gadishmërinë për mbështje në këtë drejtim”.
“Në takimin me Ministren e Arsimit të Finlandës, Sanna Grahn-Laaksonnen, theksi u vu tek thellimi i bashkëpunimit në fushën e Arsimit Profesional, ku ministri Klosi falenderoi Finlandën për mbështetjen në këtë drejtim, shtet me të cilin së shpejti do të nisë edhe binjakëzimi i shkollave pyjore, siç u ra dakort gjatë kësaj vizite pune. Shkolla e Mesme Teknike e Pyjeve Shkoder “Kole Margjini” do të binjakëzohet me Shkollën Finlandeze Jamsa Vocational School, një nga shkollat më të mira pyjore të këtij vendi”, thuhet në njoftimin për mediat.
Gjatë takimit me Ministren e Arsimit të Finlandës, ministri Klosi bëri një panoramë të Arsimit Profesional në Shqipëri, orientimit të keq të sistemit arsimor në 25 vite tranzicion, duke e shkëputur atë nga nevojat e tregut të punës, si dhe vuri theksin tek përpjekjet e mëdha që po bën Ministria e Mirëqenies Sociale dhe Rinisë për fuqizimin e arsimit profesional në vend, si mekanizëm për uljen e papunësisë dhe rritjen ekonomike.
Ministri Klosi vlerësoi si tejet të vlefshme për ngritjen e arsimit profesional në Shqipëri, mbështetjen e Finlandës si një nga vendet me sistemin arsimor më të mirë në botë. Në këtë drejtim, ministri Klosi vlerësoi asistencën dhe shkëmbimin e eksperiencave në drejtim të arsimit dhe formimit profesional me Finlandën. Ministrja e Arsimit të Finlandës, Sanna Grahn-Laaksonnen, shprehu gadishmërinë për mbështetjen e plotë për Shqipërinë, për ngritjen e Arsimit Profesional, duke e vlerësuar si tejet të rëndësishme përpjekjen për zhvillimin e zanateve në vend, si një nga format e zhvillimit ekonomik dhe social të vendit./a.m.
