Policia greke ka dhënë detaje për supëroperacionin e drogës në Greqi, në të cilin përfshihet edhe një person shqiptar, që sipas mediave të vendit fqinj, cilësohet si Eskobari i Ballkanit.
Në një njoftim të gjatë për mediat, Policia greke tha se ka kryer operacione të koordinuara në të gjithë zonën e Atikës.
Kështu, Janë bërë operacione të mëdha në Atika, Salamina, Kalithea, Veria, ku janë arrestuar 15 pjesëtarë të këtij rrjeti, 13 grekë, dhe dy shqiptarë.
Sipas Policisë greke, dy shqiptarët e arrestuar nuk ishin rezidentë në Greqi, por hynin atje për të kontrolluar ecurinë e transportit të drogës.
Policia greke njofton se operacionet janë ndërmarrë me ndihmesën e DEA-s së SHBA-ve. Sipas saj, organizata është mjaft e gjërë dhe përfshin edhe disa kompani transportesh që veprojnë në Europë, përmes kontejnerëve të licencuar, që shpeshherë u shpëtojnë edhe kontrolleve.
Gjithashtu, Policia greke thotë se në krye të kësaj organizate qëndron një shqiptar 44-vjeçar, por nuk e ka bërë të ditur emrin e tij. Ai është ndërlidhësi i kalimit të drogës nga Shqipëria në Greqi, kryesisht me kamionë të licencuar dhe me patentë ndërkombëtare.
Policia greke thotë se ka arrestuar edhe një austriak, i cili është marrë me rekrutimin e drejtuesve të kamionëve që bëjnë linja ballkanike. Ai u ofronte para atyre për të kaluar drogën.
Gjithashtu, Policia greke thotë se tentakulat e organizatës shtrihen edhe në vende të tjera të ballkanit. Një pjesë e tyre janë zbuluar, pasi në rastin kur arrestoheshin drejtuesit e kamionëve me drogë, pjesëtarë të organizatës krijonin kontakte me familjarët e tyre, që kanë qenë nën përgjim.
Hetimet kanë nisur që në vitin 2014, dhe kanë dy vjet që ecin me sekuestrime të sasive të mëdha të drogës./Panorama/a.m.
