Vëllezërit Haxhia janë bërë krejtësisht të pabesueshëm! Kështu shprehet Fatos Klosi, ish shef i SHIK-ut, pas një sërë akuzash që i kanë bërë ditët e fundit vëllezërit Izet dhe Ismet Haxhia, të akuzuar dhe të dënuar për pjesëmarrje në vrasjen e Azem Hajdarit.
“Nuk marr asgjë seriozisht nga ato që thonë vëllezërit Haxhia. Përderisa ata sajojnë situata dhe emra që unë nuk i kam dëgjuar ndonjëherë, atëherë unë i vë në dyshim edhe deklaratat e tjera të tyre.”
Kështu u shpreh dje ekskluzivisht për gazetën ‘DITA’ ish-shefi i Shërbimit Informativ Kombëtar, Fatos Klosi, pas akuzës që Ismet Haxhia bëri dje se “Fatos Klosi i ka ofruar 100 mijë dollarë që Izet Haxhia të dëshmonte në gjyq se Sali Berisha ishte urdhëruesi për vrasjen e Azem Hajdarit.”
Një ditë më parë, Fatos Klosi i cilësoi të pabaza akuzat Izet Haxhisë kundër tij.
I pyetur për akuzën se së bashku me “Grupin e Rognerit” planifikoi vrasjen e Azem Hajdarit, Klosi tha se nuk i bëjnë përshtypje deklaratat e ish-badigardit të Berishës.
“Më morën nga Prishtina dhe më thanë, mos u bëj merak se çfarë shkruan Izet Haxhia. Më mirë se të tjerët, e di unë se çfarë kam bërë në punën time.
Kur nuk u merakosa kur dola para Komisionit Hetimor Parlamentar, kur i kisha të gjithë kundër, kur kisha dhe Nanon dhe Berishën përballë sepse ishin në periudhë mjalti mes tyre, e jo më tani me Izetin.
Atëherë nuk pata asnjë merak se isha i qartë se çfarë kisha bërë me detyrën time”, shprehet Klosi.
Duke folur për gjyqin e Azem Hajdarit, shprehet se Izet Haxhia duhet të kishte folur gjatë kohës që zhvillohej gjyqi, tani është vonë dhe dëshmitë e tij nuk do të mund të ndryshojnë asgjë.
“Unë nuk besoj se kjo do të përmbysë ndonjë gjë. Sepse shumica e njerëzve nuk janë gjallë. Ata që e vranë, vërtet nuk janë. Jaho është në burg dhe ai nuk ka folur dhe është dënuar me burgim të përjetshëm. Them se është e vështirë të ndryshojë ndonjë gjë në atë gjyq”- thotë ai.
Sipas Klosit, vrasësit e Azem Hajdarit i kanë thënë se ishin në hakmarrje me të, por Berisha kishte interes nga eliminimi.
“Vrasësit më kanë thënë se ne me Azemin ishim në hakmarrje, por Berisha kishte interes nga ai eliminim. Bashkëpunuam të dyja palët dhe u krye. Në mënyrë të përsëritur Berisha ka deklaruar se kur të vijmë në pushtet, do ta zbardhim dosjen “Hajdari”. Unë Berishës i kam kërkuar publikisht që të rihapë gjyqin e Azemit. Por ai, për 8 vjet në pushtet, nuk e preku me dorë dhe vazhdon të thotë se Azem Hajdarin e ka vrarë Fatos Klosi”, thotë Klosi.
ma.me
