Në Ditën Ndërkombëtare të Familjes, ministri i Mirëqenies Sociale dhe Rinisë, Blendi Klosi prezantoi strategjinë e re të mbrojtjes sociale. “Një familje e shëndoshë dhe e bashkuar është aleati më i madh dhe më i fortë i shtetit social që ne duam të ndërtojmë”, deklaroi ministri Klosi.
Ai renditi disa nga masat që ka ndërmarrë kjo qeveri për ti ardhur në ndihmë sidomos familjeve në nevojë. “Reforma e ndihmës ekonomik kishte një parim të vetëm, që ndihma ekonomike të mos ishte vullnet politik i të zgjedhurve apo e të bëheshin votuesit rob të ndihmës ekonomike për të dhënë votën”, deklaroi ministri.
Sipas tij, reforma e ndihmës ekonomike që nga viti 2013 gjen implementimin e saj në të gjithë Shqipërinë. Është një reformë, tha Klosi, e cila shkon aty ku i varfri jeton. Po ashtu, ai informoi se qeveria hoqi ndihmën e pjesshme, një masë shumë e vogël dhe vendosi dhënien e ndihmës së plotë. “Kemi këtë vit, 5 herë më shumë nxitje punësimi se sa dy vite më parë për familjet në nevojë”, tha Klosi. Kreu i MMSR, Klosi vuri në dukje se sot në të gjithë vendin ka organizata që punojnë me fëmijët në rrugë, me gratë, me fëmijët e komunitetit rom.
I pranishën ishte edhe Kryetari i Bashkisë, Erion Veliaj, i cili i bëri thirrje donatorëve që vëmendjen të shtrijnë edhe në bashkitë e tjera, të cilat kanë shumë vështirësi për të krijuar një jetë me shërbime sociale.
“Shumë ide që kishin filluar tre vite më parë po gjejnë zgjidhje edhe në bashkinë e Tiranës. Por përveç Tiranës do të doja t’ju bëja thirrje të shikonit përtej Tiranës. Ka shumë kryetarë bashkie në rrethe që e kanë të vështirë, prandaj doja që shumë prej donatorëve të shikonin në bashkitë e tjera”, tha Veliaj. Veliaj po ashtu theksoi se fytyra sociale e shtetit shqiptar është shumë herë më e dukshme sot, ndërsa solli në vëmendje edhe vendimin e qeverisë për pensionin social.
Ministria e Mirëqenies Sociale dhe Rinisë, organizanoi tek Pedonalja e Tiranës, pranë kalasë, Panairin e shërbimeve për familjen. Sipas Kombeve të Bashkuara, 15 Maji është Dita Ndërkombëtare e Familjes. Kjo ditë njihet në botë që nga viti 1993, kur u soll rezoluta për shënimin e Ditës së Familjes. Familja si shtyllë e çdo shoqërie mbrohet nga Kombet e Bashkuara në Deklaratën Universale të të Drejtave të Njeriut. Kjo ditë simbolizon anembanë botës përkrahjen e vlerave dhe rëndësinë e familjes në shoqëri. Institucionet shtetërore dhe organizata të larmishme e përkujtojnë këtë ditë me programe dhe koncerte të ndryshme./a.m.
