Ministri i Turizmit dhe Mjedisit, Blendi Klosi gjatë një bashkëbisedimi të zhvilluar sot me akademikë, profesorë, inxhinierë dhe të rinj, u shpreh se inxhinierëve të rinj iu duhet që “Temat e diplomave të ndërlidhen me nevojat e Ministrisë së Turizmit dhe Mjedisit si dhe studimet doktorale të orientohen tek problematikat aktuale e mjedisit për ekspertizë profesionale”.
Sipas ministrit, janë bërë një sërë reformash për mjedisin, si reduktimi me 70% i përdorimit të qeseve plastike si dhe ndërhyrjet në 18 industri, miniera, gurore, në vendgrumbullime mbetjesh, për një mjedis më të pastër.
Gjatë takimit ministri Klosi tha se, “janë miratuar vendime për automjetet, si ndotësit kryesor në ajër, politikat dhe strategjitë e qeverisë për të pastruar Shqipërinë, duke reduktuar në masën 70% importimin, tregtimin dhe përdorimin e qeseve plastike; duke mos lejuar importin e automjeteve me mbi 10 vite përdorim; duke përmirësuar vendgrumbullimet e mbetjeve urbane; mbylljen e atyre ilegale apo mbylljen e guroreve. Shqipëria vazhdon të jetë e papastër për ministrin, sfida për turizëm më cilësor me më shumë standarde lidhet edhe me një mjedis të pastër, për këtë arsye ndërhyrja në 18 industri është sukses i padiskutueshëm i qeverisë, që do të vijojë me zbatimin e projektit Clean&Green, për një Shqipëri ambientale brenda 2020-s. Vendosja e një rregulli do na ndihmojë të kemi një sistem shumë më të mirë strukturuar, po ashtu kemi nevojë e një hartë të menaxhimit të mbetjeve urbane për të gjetur mënyrën sesi t’i rehabilitojmë këto mbetje urbane. Ka ardhur koha që Shqipëria të ketë një urdhër për punonjësit mjedisor. Ka ardhur koha që ne të mbrojmë edhe veten tonë, edhe politikat që ne ndërmarrim nëpërmjet grupeve të strukturuara të ekspertëve”, tha ministri Klosi, i bindur se politikat e duhura kanë nevojë për njerëzit e duhur.
