Ministri i Mirëqenies Sociale dhe Rinisë, Blendi Klosi ka dënuar ashpër edhe në seancën e sotme plenare ngjarjet e ndodhura në Shtëpinë e Fëmijës në Shkodër, duke theksuar se reagimi i institucionit që ai drejton ishte i menjëhershëm dhe pa asnjë ndjesi politike, duke çuar për ndjekje penale tre punonjësit e përfshirë në videon e transmetuar në media, si dhe duke shkarkuar drejtoreshën e qendrës. “Morra pjesë vetë në një bisedë me të gjithë kolektivin e atij institucioni, shkarkuam drejtoreshën e institucionit. Pashë se nuk kishte ajo administratë asnjë të emëruar politik, ishin të gjitha edukatore me nga 20 vjet, por edukatore të familjarizuara me situatën. Dhe kjo për mua është shqetësuese”, – tha Klosi, ndërsa theksoi se është i vendosur për të ndërmarrë të gjitha veprimet që gjendja të ndryshojë jo vetëm në atë qendër, por në të gjitha institucionet që ofrojnë shërbime sociale.
Për këtë, ai ka bërë të ditur se nesër ka thirrur në një takim të gjithë punonjësit socialë në të gjithë vendin, për të biseduar por edhe për të ndërmarrë hapat që do t’i jepnin zgjidhje këtij sistemi në përgjithësi, i cili sipas Klosit “ka degraduar komplet”. Por nga ana tjetër, duke iu përgjigjur akuzave të ngritura nga deputetja demokrate, Albana Vokshi, ai ka theksuar se Partia Demokratike nuk mund të bëjë politikë me ngjarje të tilla dhe në mënyrë të veçantë me Shtëpinë e Fëmijës në Shkodër. Dhe kjo për një fakt të thjeshtë, pasi kjo qendër në vetëm dy vite, sipas Klosit ka pësuar një transformim total, të kushteve dhe të menaxhimit të saj. Ai ka paraqitur para deputetëve fotot që tregonin gjendjen e kësaj godine, brenda dhe jashtë, në vitin 2013, dhe gjendjen në të cilën ajo është transformuar sot.
“Është e vështirë për ju të bëni politikë. E dini pse? Sepse ndryshimi në këto dy vite në po atë qendër është marramendës, ndryshimi është spektakolar. Qendra e Fëmijëve në Shkodër në vitin 2013 ishte me plot 10 milionë lekë borxhe, fatura të papaguara për gazin, gatimin, fatura energjie, uji etj. Mungesë totale medikamentesh. Fëmijë që nuk ndiqnin arsimin parashkollor që para vitit 1990. Infrastrukturë komplet e rrënuar, meny e papërshtatshme ushqimore, hanin bukë me sheqer fëmijët, vetëm dy vjet më parë. Ashtu siç e latë shtetin në borxhe të pafundme, edhe ajo qendër aq e vogël me vetëm 18 fëmijë të rrugës, të marrë nga shteti në patronazh, ishte me borxhe, me fatura të papaguara. Nga 2013 në 2015 janë kthyer mbi 10 fëmijë në familjen e tyre biologjike. Qendra nuk ka asnjë borxh të mbartur, buxheti mundëson të gjitha shpenzimet për aktivitetin e plotë të fëmijëve”, – tha Klosi në fjalën e vet, duke paraqitur situatat e qendrës edhe me ilustrime të fotove të bëra në dy kohë, më 2013 dhe në 2015. Më poshtë po pasqyrojmë disa nga fotot e bëra publike dje nga Klosi.
