Është nënshkruar sot në Prishtinë marrëveshja e bashkëpunimit në fushën e rinisë mes Shqipërisë dhe Kosovës. Marrëveshja është firmosur nga ministri i Mirëqenies Sociale dhe Rinisë i Republikës së Shqipërisë, z. Blendi Klosi dhe z. Kujtim Shala, zëvendëskryeministër, njëherësh ministër i Kulturës, Rinisë dhe i Sportit i Republikës së Kosovës. Sipas kësaj marrëveshjeje, Kosova dhe Shqipëria bien dakord që të ndërmarrin politika dhe programe të përbashkëta në favor të nxitjes së bashkëpunimit dhe formimit të të rinjve në të dyja vendet.
Të dy ministrat theksuan se marrëveshja është një mundësi konkrete që Kosova dhe Shqipëria të ndjekin politika dhe programe, me aktivitete dhe veprime të përbashkëta në fusha të ndryshme dhe në funksion të përgatitjes së dy vendeve për integrim në Bashkimin Europian. Duke folur për mediat pas nënshkrimit të kësaj marrëveshjeje, ministri kosovar, Kujtim Shala vlerësoi bashkëpunimin e frytshëm që të dyja këto ministri kanë pasur në fushat që ato mbulojnë, ndërsa theksoi se me marrëveshjen e sotme hidhet një hap shumë i rëndësishëm në konkretizimin e veprimeve për politikat e rinisë mes dy vendeve tona. “Akti i nënshkrimit është një akt i rëndësishëm, me të cilin ne formalisht lidhim politikat tona që kanë të bëjnë me fushën e rinisë. Ne kemi bashkëpunim shumë të mirë në disa fusha, por konkretizimi edhe i kësaj natyre, siç është dhe marrëveshja e sotme, u ka hapur rrugë mbledhjeve të përbashkëta të dyja qeverive dhe deklaratat e përbashkëta, të cilat vërtet janë orientim strategjik i të dyja qeverive për politika të përbashkëta”, – tha ministri Kujtim Shala në fjalën e tij.
Nga ana e tij, ministri Blendi Klosi u shpreh se marrëveshja në fjalë hap dritën jeshile të bashkëpunimit midis të rinjve të Kosovës dhe atyre të Shqipërisë, me qëllim përgatitjen për tregun e punës, përfshirjen në vendimmarrje, edukimin kulturor dhe profesional, mbrojtjen e shëndetit, tolerancën fetare dhe vullnetarizmin. “Ne sot nënshkruam një marrëveshje të përbashkët, e cila do të jetë një hap i parë në hapjen e disa aktiviteteve që ne do realizojmë duke startuar të gjithë punën tonë në datën 12 gusht, që është dhe dita e Rinisë, ku dhe do kemi aktivitetet e para të përbashkëta”, – u shpreh ministri Blendi Klosi.
Gjatë qëndrimit në Kosovë, ministri Blendi Klosi ka pasur edhe një sërë takimesh të tjera me zyrtarët më të lartë kosovarë, ku veç bashkëpunimit për rininë, fokusi i bisedimeve ka qenë binjakëzimi i shërbimeve sociale, orientimi i formimit profesional të të rinjve drejt kërkesave të tregut të punës, si dhe startimi i marrëveshjes në fushën e sigurimeve shoqërore. Ai pati një takim me kryeministrin Isa Mustafa, me të cilin u diskutua për mundësitë e çuarjes më përpara të bashkëpunimit ndërmjet dy shteteve në fushën e punësimit, mirëqenies sociale dhe rinisë. Nga ana e tij, Kryeministri kosovar pasi bëri një përshkrim të politikave të Qeverisë së Kosovës në hapjen e vendeve të reja të punës dhe forcimin e shtetit ligjor, theksoi angazhimin për të çuar më përpara bashkëpunimin me Shqipërinë për zbatimin e projekteve që sjellin zhvillim më të madh ekonomik dhe social për qytetarët e të dyja vendeve. Ndërsa ministri Blendi Klosi shprehu vullnetin e Qeverisë së Shqipërisë për thellimin e bashkëpunimit me Qeverinë e Kosovës, me fokus kryesor te nxitja e punësimit dhe mirëqenies sociale.
Ministri Klosi u prit në një takim edhe nga kryetari i Kuvendit të Kosovës, z. Kadri Veseli, i cili nga ana e tij kërkoi që bashkëpunimi mes dy vendeve të jetë më konkret dhe i prekshëm për qytetarët në të dyja anët e kufirit. Ndërsa ministri Klosi e njohu kryeparlamentarin Veseli me disa bashkëpunime konkrete që të dyja vendet po realizojnë, sidomos në fushën e arsimit profesional, politikave sociale, si dhe krijimin e një tregu të përbashkët pune.
Një takim të veçantë ministri Klosi e pati edhe me zëvendëskryeministrin e parë, njëherësh ministër i Punëve të Jashtme të Republikës së Kosovës, z. Hashim Thaçi, ku u diskutua po ashtu për mundësitë e zhvillimit të projekteve të përbashkëta në shërbimet sociale dhe formimin profesional, si një kërkesë e tregut të punës. Sipas z. Thaçi, Kosova dhe Shqipëria nuk kanë kurrfarë pengesash në bashkëpunim, por këtë duhet ta thellojnë edhe më shumë në rrafshin praktik, sepse vullneti dhe gatishmëria nuk kanë munguar asnjëherë. Ndërsa ministri Klosi theksoi se është e nevojshme që të praktikohen shërbime dhe skema të njëjta aty ku të dyja shtetet munden, si për të moshuar, ashtu edhe për tregun e punës, duke u ofruar trajnime të interesuarve, në përputhje me nevojat e bizneseve.
