Beteja në distancë ndërmjet kryeministrit Isa Mustafa dhe ish-shefit të SHIK-ut të Shqipërisë, Fatos Klos lidhur me luftën e Kosovës vazhdon. Këtë radhë ka qenë ish-kreu i SHIK i është kundërpërgjigjur Mustafës duke thënë se ata që u fshehën skutave s’mund të flasin për luftën e UÇK-së.
Sipas Klosit, të vërtetën e luftës për çlirimin e Kosovës “e dinë dhe mund ta thonë vetëm ata që luftuan në radhët e UÇK-së, ata që punuan dhe luftuan së bashku me të, aleatët e saj shqiptarë e të huaj. Për këtë aspekt, nuk kanë gojë të flasin ata që gjatë luftës u përpoqën të fshihen në skuta”…
Më herët ish-shefi i SHIK-ut Fatos Klosi kishte folur për kohën kur ishte në krye të Shërbimit Informativ të Shqipërisë, duke u shprehur se Ibrahim Rugova udhëhiqte politikë pa krye.
Pas kësaj, në një reagim të tij në rrjetin social Facebook, Isa Mustafa iu kundërpërgjigj duke u shprehur se SHIK-u i drejtuar prej Klosit më shumë i vinte në ndihmë Serbisë.
Më poshtë intervista e plotë e Fatos Klosit:
Zoti Klosi, Kryeministri i Kosovës, Isa Mustafa, ju ka sulmuar dje shumë ashpër lidhur me një intervistë tuajën në mediat kosovare. Ai ju sulmon direkt ju kur thotë: “SHIKu shqiptar, sepse shërbime të tilla me sjelljen e tyre më shumë u kanë shërbyer regjimeve dhe Serbisë, vëllavrasjes e hasmërive të brendshme, sesa pavarësisë së Kosovës dhe interesave kombëtare”. Si u ndjetë kur lexuat etiketimet e zotit Mustafa?
Më vjen shumë keq që një politikan, që sot pretendon të qeverisë Kosovën, acarohet kaq shumë nga opinion i një qytetari, opinion që nuk vjen nga informacione sekrete, është thjesht një opinion i formuar gjatë përcjelljes së gjithë aktivitetit politik, publik të Z. Rugova.
Ju keni folur për UÇK-në si protagoniste e luftës për çlirimin e Kosovës. Çfarë mendoni se i ka “djegur” zotit Mustafa nga intervista juaj?
Sigurisht, duke u hequr se po mbron figurën e Rugovës, ai përpiqet të justifikojë sjelljen dhe qëndrimin e tij lidhur me luftën e UÇK-së.
Sipas jush, a e ka përshpejtuar apo ngadalësuar çlirimin e Kosovës Ibrahim Rugova?
Nëse SHIK-u u përpoq ta përçante apo ta kompaktësonte UÇK-në, këtë e dinë dhe mund ta thonë vetëm ata që luftuan në radhët e UÇK-së, ata që punuan dhe luftuan së bashku me të, aleatët e saj shqiptarë e të huaj. Për këtë aspekt, nuk kanë gojë të flasin ata që gjatë luftës u përpoqën të fshihen në skuta të rehatshme, sa më larg saj.
Redaksia Online
(Javanews.al)
