Ministri i Mirëqënies Sociale dhe Rinisë, Blendi Klosi, mori pjesë në prezantimin e analizës 9-mujore me drejtuesit zyrave të Punës, Inspektoratit të Punës dhe shkollave profesionale për rajonin e Beratit, ku të pranishëm ishin edhe përfaqësues të biznesit rajonal dhe shoqatave kombëtare të biznesit.
Ky aktivitet u shërbeu përfaqëuesve të biznesit të paraqesin shqetësimet dhe kërkesat për zhvillimin dhe zgjerimin e mëtejshëm të sipërmarrjeve të tyre, ku u vecua nevoja për krah pune të kualifikuar.
Drejtues të Kompania fasone “Center Shqiptare Group” që zhvillon veprimtarinë e saj në Berat, në prodhimin e çantave prej letre dhe veshjeve të punës, u shprehën se në këtë rajon ka vështirësi në gjetjen e krahut të punës. “Kjo kompani që ka aktualisht afro 1200 punëtorë, kërkon të zgjerojë biznesin e saj, por e ka të pamundur pasi mungon krahu i punës dhe sidomos krahu i punës i kualifikuar”, iu drejtuan ata ministrit.
Për ministrin Klosi, kjo është një dëshmi reale e asaj që në fakt ekziston sot në të gjithë vendin, ku njëra anë ka një numër të madh personash të regjistruar si të papunë dhe nga ana tjetër, po në të njëjtat zyra ka afro 30 mijë vende pune të ofruara nga biznesi dhe që presin një krah pune të kualifikuar. “Këtu realisht ndjehesh shumë mirë se kupton që në Shqipëri punohet, Shqipëria punon dhe këtu në këtë ambient kupton se sa shumë nevojë kemi ne për punëtorë të kualifikuar”.
Në emër të biznesit, kreu i “Biznes Albania”-s, Luan Bregasi, në fjalën e tij u përqendrua pikërisht te politikat nxitëse të punësimit që ka ndërmarrë qeveria kohët e fundit, duke theksuar se ato kanë dhënë efektet e veta pozitive.
