Ish-kreu i SHISH, Fatos Klosi dhe avokati Spartak Ngjela, janë shprehur se sulmet e Sali Berishës ndaj ambasadorëve vijnë për shkak të frikës nga reforma. Ata thonë per Sot se Berisha po tenton të mbrojë dhe kryeprokurorin Adriatik Llalla dhe të korruptuarit, pasi ka frikë nga ndëshkimi.
“Berisha ka frikë nga vetingu. Edhe deputeti i PE i thotë demokratëve lërini historitë e grevës së çadrës dhe shkoni në komisione dhe bëni vetingun. Kjo është ajo që vlerësohet nga Europa. Ata nuk e duan vetingun. Meqë po këmbëngul ambasadori amerikan dhe ambasadorja e BE, i quan guvernator të Ramës. Kur të huajt e kanë përkrahur, i ka quajtur të mirë; kur të huajt e kanë kundërshtuar, nuk ka lënë gjë pa thënë. Berisha do ta marrë në mbrojtje dhe kryeprokurorin sepse vetë e ka vënë. Vetingu po bëhet kundër prokurorit, kundër Gjykatës së Lartë dhe gjithë institucioneve të drejtësisë. Është një proces i ndërrimit të gjykatësve dhe prokurorëve të korruptuar. Duke qenë kundër vetingut, sigurisht është në mbrojtje dhe të Prokurorit të Përgjithshëm”, u shpreh Klosi.
Në të njëjtën linjë ka qenë dhe avokati Ngjela. “Ju keni të bëni me një roço. Nëse Rama drejtoka dy ambasadorët më të fuqishëm të botës që janë këtu, do të ishte absurde dhe qesharake. Si e drejtoka Rama ambasadorin amerikan? Berisha është në hall të madh të ndëshkimit.
Do ndëshkohet. Është politikisht i vdekur. Nuk ngjallet më! Është i kryqëzuar në krime. Derisa ka arritur në këtë nivel, është në hall shumë të madh. Nuk ikin ambasadorët nga Shqipëria. Ata drejtojnë reformën për shqiptarët”, u shpreh Ngjela.
ma.me
