Ministri i Mirëqenies Sociale dhe Rinisë, Blendi Klosi, në një dalje publike nga ambientet e kryeministrisë bëri me dije se Këshilli i Ministrave ka miratuar 7 programe punësimi dhe përfshirje për kategori të ndryshme sociale.
Klosi shprehu synimin e qeverisë për të 7-fishuar numrin e të punësuarve krahasuar me dy vite më parë.
“Grupet të cilat do të nxiten më shumë janë: të rinjtë, gratë, romët, personat me aftësi të kufizuar, jetimët dhe grupet e tjera shoqërore që e kanë të vështirë të përfshihen në tregun e punës. Sot, qeveria shqiptare miratoi 7 programe të reja që do të zbatohen gjatë vitit 2016 duke mundësuar punësimin e mbi 10 mijë punëkërkuesve të papunë, ku rreth 70% e tyre do të jenë gra edhe vajza edhe 55% e gjithë programit do të jenë punëkërkues të rinj”, tha Klosi.
Po ashtu, Ministri Klosi nënvizoi vëmendjen e qeverisë për këto grupe, duke sjellë sipas tij nevojën për transparencë. “Ndryshimet e miratuara sot në këto programe synojnë rritjen e transparencës si dhe rritjen e numrit të punëdhënësve të aplikuar. Këto projekte të reja kërkojnë përfshirje sa më të madhe të punëkërkuesve të papunë. Me këto programe, nis dhe një sistem i ri vlerësimi që do të japë një rezultat. Gjithashtu, ndryshimet e sotme sjellin disa risi në grupet e këtyre programeve duke sjellë një targetim të punëkërkuesve të rinj, për t’iu përgjigjur më shumë nevojave që ka tregu i punës”, shtoi ai.
Sipas Klosit, vëmendje e veçantë do i kushtohet të rinjve që hyjnë për herë të parë në tregun e punës, pra të rinjtë e sapodiplomuar.
“Kjo do të bëhet duke nxitur punësimin nëpërmjet një programi të integruar, nëpërmjet punës me një periudhë 3-mujore me garantimin e punësimit për një periudhë 9-mujore, subvencionimin e pagës në një nivel më të lartë se minimalja në shkallë vendi dhe sigurimeve shoqërore, që e bëjmë këtë skemë më alternative si për punëkërkuesit dhe për punëdhënësit. Paralelisht, kohëzgjatja e kontratës së punësimit deri në 15 muaj rrit probabilitetin e një punësimi të qëndrueshëm.Grupe të tjera pjesë e këtyre programeve do të jenë gratë kryefamiljare, gratë nëna. Është miratuar rritja e nivelit të subvencionimit të pagave në masën 115 % të pagës minimale në shkallë vendi. Programi i nxitjes së punësimit, mbështet të rinjtë nën moshën 30 vjeç që kanë statusin e jetimit”, përfundoi Klosi.
