Pas emrave si Ramires, Lavezzi, Gervinho, Guarin tashmë edhe Oscar vendosi të transferohet në Kinë. Ish-mesfushori i Chelsea iu shtua listës së lojtarëve që nuk i rezistuan milionave të kompanive aziatike dhe pranoi ofertën e çmendur të Shanghai SIPG, pavarësisht se është vetëm 25 vjeç.
Zgjedhja e Oscar nuk është pritur aspak mirë nga trajneri i Liverpool, Jurgen Klopp, që në konferencë për shtyp deklaroi se vendimi për të luajtur në moshë kaq të re në një kampionat anonim është absurd.
“Nuk e kuptoj përse njerëzit marrin vendime të tilla. Për mua kjo nuk është një zgjedhje. Në këto momente, në kampionatin kinez nuk luhet futboll i vërtetë.
Mënyra e vetme që në Superligën kineze të blejnë futbollistë janë paratë: ato janë e vetmja mënyrë për të afruar lojtarët. Jetojmë në një botë të lirë dhe zakonisht futbollistët zgjedhin të transferohen në Kinë në një moshë madhore, kur janë drejt fundit të karrierës dhe jo në moshën 25-vjeçare.
Kampionati kinez nuk është ëndrra e lojtarëve profesionistë, por nëse disa njerëz preferojnë paratë, atëherë e sheh veten të pafuqishëm. Ndoshta tani familja e Oscar është e lumtur, sepse paratë nuk do të jenë më një problem.”
Braziliani Oscar vendosi të largohet pas katër vitesh e gjysmë nga Chelsea, ku kontribuoi në sukseset e skuadrës në Premierligë, Kupën e Ligës dhe në Europa League, shkruan shqip. Nga transferimi i tij, blutë e Londrës përfituan rreth 60 milionë euro, ndërsa Oscar do të përfitojë 25 milionë euro bruto në sezon, duke hyrë në listën e lojtarëve më të paguar në botë./a.k
