Investitorët e huaj duhet të jenë këmbëngulës për të përmirësuar klimën e biznesit në Shqipëri. Ambasadorja amerikane, Yuri Kim, foli para anëtarëve të Dhomës Amerikane të Tregtisë, duke i shtyrë ta bëjnë zërin e tyre të dëgjohet.
“Shqipëria ka nevojë të përmirësojë klimën e saj të biznesit dhe të luftojë korrupsionin për të kuptuar potencialin e plotë të vendit. Ky është një grup shumë i fuqishëm, 3 miliardë dollarë në xhiro, 40 mijë të punësuar, kjo ju jep një zë. Ndaj vendosni cilat janë prioritetet tuaja dhe thjesht jepini…Cilat janë prioritetet tuaja? Na i thoni edhe neve, mund t’ju ndihmojmë në anë, por ju takon ju të drejtoni”, u shpreh ambasadorja amerikane.
Dhoma Amerikane e Tregtisë, së bashku me atë gjermane, italiane, franceze dhe Confindustria Albania, janë bashkuar në fillim të këtij muaji për t’i kërkuar qeverisë shqiptare reforma në fusha si lufta kundër korrupsionit, prokurimi publik, konsultimi i projektligjeve dhe modernizimi i sistemit të taksave. Sipas presidentit të Amcham, Enio Jaço, këto propozime po diskutohen.
“Qeveria ka njohur se këto janë rekomandime shumë të vlefshme. Por ende nuk kemi parë ndonjë nivel zbatim të mjaftueshëm në këtë pikë. Por shpresojmë të shohim në të ardhmen”.
“Investitorët pyesin për aksesin në leje për investime, a është e lehtë, a është e vështirë? Niveli i korrupsionit, sa keq është? Prokurimi publik, a kanë investitorët e huaj akses në tendera? Dhe a ka incentiva për të investuar? Këto janë elemente të rëndësishme të një mjedisi investimi tërheqës”, deklaroi Jaço.
Gjatë takimit vjetor të asamblesë së Përgjithshme të Amcham, u nënvizua rritja e fortë e investimeve direkte nga Shtetet e Bashkuara dhe trefishimi i eksporteve drejt Amerikës.
/a.r
